झापा । दक्षीणी भारतको केरला राज्यमा देखिएको कोरोना भाईरस नयाँ भेरियन्ट भएको विश्व स्वास्थ्य संगठनले पुष्टी गरेको छ । भारतको केरलामा एक हजारभन्दा बढी मानिस नयाँ प्रकारको भेरियन्टको कोरोना भाइरसबाट संक्रमित भएको भारतिय सञ्चारमाध्यमहरुले जनाएका छन । गत शनिबार एकै दिन कोरोना संक्रमणकै कारण केरलामा तीन जनाको मृत्यु भएको थियो ।यता भारतमा देखिएको कोरोना भाइरसबाट डराउनु नपर्ने नेपाल सरकारले जनाएको छ ।
स्वास्थ्य तथा जनसंख्या मन्त्रालयले भारतको केरलामा देखिएको कोरोना भाइरसको नयाँ भेरियन्टको सङ्क्रमणबाट नआत्तिन सबैमा आग्रह गरेको छ । स्वास्थ्य तथा जनसङ्ख्या मन्त्रालयका प्रवक्ता डा प्रकाश बुढाथोकीले नेपालको सीमाभन्दा टाढा केरला राज्यमा देखिएको सङ्क्रमणबाट डराउन नपर्ने बताए । भारतमा देखिएको सङ्क्रमण श्वासप्रश्वाससम्बन्धी रहेकोले आत्तिनुपर्ने अवस्था नरहेको बताए । अहिले भारत र चीनमा श्वासप्रश्वास समस्या बढिरहेको बताए । बुढाथोकीले कोरोनाका बेला तयार गरिएको सघन उपचार कक्ष (आइसियु), अक्सिजनलगायत भौतिक पूर्वाधार आवश्यक परेका बेला प्रयोग गर्न सकिने बताए ।
“अहिले देखिएको नयाँ भेरियन्ट नयाँ भए पनि नयाँ लक्षण यसमा छैन । त्यही श्वासप्रश्वास सम्बन्धी नै लक्षण अहिलेको नयाँ भेरियन्टमा देखिएको छ”, उनले भने , “हामीसँग भएका भौतिक पूर्वाधार र जनशक्ति तालिमप्राप्त भएकाले आत्तिहाल्नुपर्ने अवस्था छैन ।” प्रवक्ता बुढाथोकीका अनुसार सीमानाका र अन्तर्राष्ट्रिय विमानस्थलमा रहेका हेल्थ डेक्सलाई तयारी अवस्थामा राखिएको र श्वासप्रश्वाससम्बन्धी समस्या आएका बिरामीलाई विशेष निगरानी गर्न आग्रह गरिएको छ । उनले लामो समयसम्म श्वासप्रश्वास समस्या देखिएका बिरामीलाई भने अणुवांशिक अध्ययन (जिन सिक्वेन्सिङ) गर्न निर्देशन दिएको बताए । सबैले कोरोना भाइरसविरुद्धको खोप लगाइसकेको हुनाले नयाँ भेरियन्टको सङ्क्रमणको रोकथाम खोपले गर्ने बताए ।
