झापा । झापाका सीमा नाकाबाट भन्सार छलेर नेपाल भित्र्याइएकाे अन्दाजी ४ लाख मूल्य बराबरकाे सामानसहित सवारीसाधन सशस्त्र प्रहरीले नियन्त्रणमा लिएको छ । सशस्त्र प्रहरी बल नेपाल बोर्डर आउट पोस्ट टाघनडुब्बाका इन्स्पेक्टर दीपेन्द्रमणि राईको कमान्डमा खटिएको टोलीले आइतबार राति ९ बजेको समयमा झापा गाउँपालिका– ४ स्थित सुकुम्वासी बस्ती नजिकैको सीमा इलाकाको सन्थालबस्तीबाट भारतबाट भन्सार छलेर नेपाल भित्र्याइएको ११ कार्टुन स्पोर्टस जुत्ता र चप्पल बरामद गरेको सशस्त्र प्रहरी बल नेपाल नम्बर २ गण झापाका सूचना अधिकारी डीएसपी दिनेश कटुवालले जानकारी दिए । बरामद गरिएको विभिन्न ब्राण्डका २५४ जोर जुत्ता र २४५ जोर चप्पललाई अन्दाजी ४ लाख ४ हजार मूल्य तोकेर मेची भन्सार कार्यालय काँकडभिट्टा बुझाएकाे उनले जनाए ।
त्यस्तै सशस्त्र प्रहरीको बिओपी नकलबन्दाले सोमबार बिहान ६ बजे काँकडभिट्टाबाट
धुलाबारीतर्फ जाँदै गरेको प्रदेश १–०१–००१ ह ९००४ नम्बरको अटो चेकजाँच
गर्दा ४ बोरा भारतीय कम्पनीका सुर्तीजन्य पदार्थ बिडी बरामद गरेको छ ।
त्यसैगरी सोमबार बिहान नै सशस्त्र प्रहरी बल
नेपाल नम्बर २ गण झापाबाट खटिएकाे सशस्त्र
प्रहरी टोलीले काँकडभिट्टाबाट धुलाबारीतर्फ जाँदै गरेको प्रदेश १–०१–००१ ह
८७४४ नम्बरको अटोबाट पनि ४ बोरा बिडी बरामद गरेको छ । नकलबन्दाको टोलीले
एउटा अटो नियन्त्रणमा लिएको र अर्को अटो त्यहाँबाट भगाएपछि गणबाट खटिएको
टोलीले सो अटोलाई पनि नियन्त्रणमा लिएको डीएसपी कटुवालले जानकारी दिए ।
बरामद गरिएको ८ बोरा बिडी दुई लाख रुपैयाँ मूल्य तोकेर मेची भन्सार
कार्यालय काँकडभिट्टा बुझाएकाे उनले बताए । दुवै अटो कालो
प्लेट नम्बर (भाडामा प्रयोग) हुने साधन भएकोले एक पटकलाई चेतावनी दिएर
छाडिदिएको उनको भनाई छ ।
