साङ्केति तस्वीर
झापा । जिल्ला प्रहरी कार्यालय सुनसरीले सहकारीको रकम अपचलन गर्ने थप ३ जना धरानबाट पक्राउ गरेको छ । शनिबार २ जना र आइतबार थप एक जना पक्राउ गरेको हो । शनिबार नै ६ जनालाई प्रहरीेले पक्राउ गरेको थियो ।
देशैभरि प्रहरीले सहकारीको रकम अपचलन गर्ने सहकारी सञ्चालक, व्यवस्थापक अध्यक्ष र कर्मचारीहरूलाई पक्राउ अभियान चलाएको छ । पोखराको सूर्यदर्शन ऋण तथा बचत सहकारी ठगी प्रकरणमा पूर्व गृहमन्त्रीसमेत रहेका राष्ट्रिय स्वतन्त्र पार्टीका अध्यक्षसहित ६३ जनालाई प्रहरीले मुद्दा चलाएपछि देशभरका सहकारीको बचत अपचलनमा संलग्न व्यक्तिहरू पक्राउ पर्न थालेका हुन् ।
वराहको भवनमा सिल
आइतबार
प्रहरीले धरान–८ स्थित धनकुटे रोडमा रहेको वराह बचत तथा ऋण सहकारी
संस्थामा इलाका प्रशासन कार्यालय, इलाका प्रहरी कार्यालय, वडा अध्यक्ष र
सहकारी पीडितको रोहवरमा ताला लगाएर कार्यालय सिलसमेत गरेको छ । उनीहरूका
सञ्चालकहरूलाई प्रहरीले खोजी गरिरहेको छ ।
प्रहरीले लेखापाल अपना श्रेष्ठ, ऋण उपसमिति सदस्य अस्मिता भण्डारी, सञ्चालक सदस्यहरू शेरबहादुर महत क्षेत्री, सरिता कालीकोटे, रवि पोर्तेल, जतनमाया विश्वकर्मा, लेखा समिति संयोजक सुदिन विकलगायत ९ जनालाई पक्राउ गरेको छ । तर प्रहरीले भने औपचारिकरूपमा पक्राउ परेकाहरूको नाम सार्वजनिक गरेको छैन । जिल्ला अदालत सुनसरीबाट २९ जनाको नाममा पक्राउ पुर्जी जारी भएको जिल्ला प्रहरी कार्यालय सुनसरीले जनाएको छ । बिहानैदेखि सञ्चालकहरूको खोजीमा प्रहरी खटिएको जिल्ला प्रहरी कार्यालयका एसपी सुमनकुमार तिम्सिनाले जानकारी दिए ।
मुख्य सञ्चालक फरार
मुख्य सञ्चालकहरू
मानबहादुर विश्वकर्मा, गङ्गा कालिकोटे, शुभराव खातीलगायतका व्यक्ति भने
फरार भएका छन् । शनिबार पक्राउ पुर्जी जारी भएको सूचना चुहिएपछि उनीहरू
फरार भएको बताइएको छ ।
जाहेरी दिन पीडित बचतकर्तालाई प्रहरीको अनुरोध
जिल्लामा
भएका सहकारीबाट ठगिएकाहरूलाई जिल्ला प्रहरी कार्यालय सुनसरीमा उजुरी दिन
आह्वान गरेको छ । प्रहरीले पुस १३ गते नै शङ्कर थापा क्षेत्रीको जाहेरीमा
नेपाल सरकार वादी भएको मानबहादुर विश्वकर्मासहितका प्रतिवादी भएको सहकारी
ठगीको मुद्दामा पीडित भएकाहरूलाई जाहेरी दरखास्त दिन अनुरोध गरेको छ ।
प्रहरीले सूचना नै जारी गरी जाहेरी आह्वान गरेको हो । आवश्यक सम्पर्क र
समन्वयका लागि प्रहरी प्रवक्ता डिएसपी रामप्रसाद तिम्सिना र सह–प्रवक्ता
इन्स्पेक्टर दिनेश अधिकारीलाई तोकिएको छ ।
वराहबाट ८ हजार बचतकर्ता पीडित
धरानको
वराह सहकारीले बचतकर्ताको करिब ९ अर्ब रकम अनियमितता गरेको सहकारी
बचतकर्ता संरक्षण राष्ट्रिय अभियानका सदस्य प्रदीप बाँस्तोलाले जानकारी दिए
। हालसम्म ९० जनाले प्रहरीमा उजुरी दिइसकेको र अब ८ हजार बचतकर्ताहरूले
जिल्ला प्रहरी कार्यालय सुनसरीमा उजुरी दिने तयारी गरेको बाँस्तोलाले बताए ।
