इलाममा उत्पादित जडीबुटीको तेल विदेश निर्यात सुरू

झापा । इलाममा उत्पादित जडीबुटीको तेल विदेश निर्यात हुने गरेको छ । माईजोगमाई गाउँपालिकामा रहेको नित्यराज दहालको उद्योगमा उत्पादित तेल विदेश निर्यात हुन थालेको हो ।

दहालले १३ वर्षअघि स्थापना गरेको यस उद्योगबाट गएको वर्षदेखि तेललगायत स्थानीय जडीबुटी विदेश निर्यात हुन थालेको बताए ।  फ्रान्समा यहाँबाट उत्पादित वस्तु जाने गरेको जानकारी दिए ।

पाती, धूपी, मेन्था, धसिङ्गरेलगायत स्थानीय जडिबुटीबाट तेल निकालिने गरिएको र त्यसमध्ये पाती, मेन्था र धूपीबाट प्रशोधित तेल विदेश निर्यात हुन थालेको उनले जानकारी दिए ।

धूपीको तेल किलोको दुई हजार पाँचसय, तीतेपातीको तेल किलोको छ हजार, मेन्थाको तेल किलोको सात हजार र धसिंगरेको तेल किलोको सात हजार रुपैयाँमा बिक्री हुने गरेको छ । दहालले ३५ रोपनी जमिनमा यस्ता विभिन्न वनस्पतिको खेती गर्दै आइरहेका छन् । 

यहाँबाट उत्पादित तेल रुघाखोखी, घाँटी दुखेको बेला प्रयोग गर्ने, चोट लागेको ठाउँमा मालिस गर्ने र हाडजोर्नीको समस्या भएका, ढाड दुखेका बिरामीहरूले यसको बढी प्रयोग गर्ने गरेको दहालको भनाइ छ ।