झापा । २०७० को दोस्रो संविधानसभा निर्वाचनदेखि लगातार धक्का खाएको सत्तारूढ दल माओवादी केन्द्रले शनिबारदेखि ‘जनतासँग माओवादी विशेष रूपान्तरण’ तीन महिने अभियान सुरू गरेको छ ।
केन्द्रीय पदाधिकारीदेखि स्थानीय कार्यकर्तासम्मलाई वडा तहमा परिचालन गरेको माओवादीले पार्टी र जनताबिच टाढिएको सम्बन्ध सुधार गरी पुनर्स्थापित हुने रणनीतिका साथ जनताको घरदैलोमा पुग्न अभियान सञ्चालन गरेको हो । प्रधानमन्त्री एवं अध्यक्ष पुष्पकमल दाहाल ‘प्रचण्ड’ले केन्द्रीय कार्यालय पेरिसडाँडाबाट ६ हजार ७४३ वडामा एकसाथ अभियानको उद्घाटन गरे ।
उद्घाटन पश्चात् प्रधानमन्त्री एवं अध्यक्ष पुष्पकमल दाहाल ‘प्रचण्ड’ आफैँ चन्द्रागिरि–२ स्थित घट्टेडाँडा पार्क क्षेत्रमा सहभागी भए । जनतासँग प्रत्यक्ष संवादमा जोडिए । उनले आफ्नो बाँकी जीवन देश र जनताका लागि देखिने गरी काम गर्ने प्रतिबद्धता जनाए ।
जनयुद्धमा जस्तै जनताको समर्थनले माओवादी फेरि बलियो शक्ति भएर उदाउने विश्वास व्यक्त गर्दै प्रचण्डले सरकार, संसद् र सडक तीनै मोर्चाबाट शान्तिपूर्ण संघर्ष गर्न निर्देशन दिए ।
त्यस्तै वरिष्ठ उपाध्यक्ष नारायणकाजी श्रेष्ठ ललितपुर महानगरपालिका–२६ स्थित हरिसिद्धि क्षेत्रमा खटिएका थिए । उपाध्यक्ष पम्फा भुसाल ललितपुर महानगरपालिका–२२ मा पुगेर स्थानीयसँग सरसफाइ अभियानमा सहभागी भइन् ।
यसैगरी उपमहासचिव एवं बागमती प्रदेशका इन्चार्ज जनार्दन शर्मा ललितपुर महानगर–२६, चिबहालमा सरसफाइमा सहभागी भए । अर्का उपमहासचिव वर्षमान पुन काठमाडौँ महानगरपालिका– १६ स्थित गोङ्गबु क्षेत्रमा रक्तदान तथा सरसफाइ अभियानमा सहभागी भए । अर्का उपमहासचिव गिरिराजमणि पोखरेल गोकर्णेश्वर न.पा–४ मा खटिएका थिए । सचिव गणेश साह अस्वस्थ भएका कारण काठमाडौँ–१० बानेश्वरमा सहभागी हुन सकेनन् । कोषाध्यक्ष श्रीराम ढकाल प्रधानमन्त्रीसँगै चन्द्रागिरि–२ पुगेका थिए ।
