झापाको कनकाई खोलामा पुरुष मृत फेला

झापा जिल्लाको कनकाई नगरपालिका–४, कोटीहोमस्थित कनकाई माई खोलाको डिलमा अन्दाजी ६० देखि ६५ वर्ष उमेरको एक अज्ञात पुरुषको शव फेला परेको छ।

शव आइतबार बिहान करिब ११:५० बजे स्थानिय बासिन्दाले खोलाको बिच भागको डिलमा घोप्टो अवस्थामा देखेका थिए। मृतक पहाडी मूलका जस्तो देखिने भए पनि हालसम्म उनको नाम, थर र ठेगाना खुलेको छैन।

घटनास्थलमा ईलाका प्रहरी कार्यालय अनारमनीबाट प्रहरी निरीक्षक (प्रनि) रूपेश राईको कमाण्डमा SOCO (Scene of Crime Officer) टोली खटिएको छ। टोलीले घटनास्थलको प्रारम्भिक अनुसन्धान गरी कानुनी प्रक्रिया अघि बढाएको जानकारी प्रहरीले दिएको छ।

प्रहरीका अनुसार मृतकको पहिचान खुलाउने प्रयास जारी रहेको छ भने शवलाई थप पोस्टमार्टम तथा अनुसन्धानका लागि आवश्यक प्रक्रिया अनुसार अगाडि बढाइएको छ।

स्थानीयवासीहरूका अनुसार मृतक क्षेत्रका परिचित व्यक्ति नभएकोले शव अन्यत्रबाट बगेर आएको हुन सक्ने आशंका गरिएको छ। यद्यपि, घटना सम्बन्धी थप विवरणका लागि अनुसन्धान जारी छ।