झापा । झापामा सशस्त्र प्रहरीले विभिन्न जातका ३७२ क्युफिट कुकाठ गोलिया बोकेको ट्रकसहित दुईजना मानिस नियन्त्रणमा लिएको छ । काठ कारोबारीले एउटै छुट पुर्जीबाट पटक–पटक काठ ओसार–पसार गर्ने गरेको पाइएपछि प्रहरीले नियन्त्रणमा लिएको सो कार्यालयले जनाएको छ ।
सशस्त्र प्रहरी बल नेपाल नम्बर २ गण हे.क्वा झापाले दिएको घटना विवरण अनुसार एउटै कागजबाट पटक–पटक काठ ओसार–पसार गर्दै गरेको सूचना पाएपछि गणबाट खटिएको प्रहरी टोलीले बुद्धशान्ति हुदै धुलाबारीतर्फ आउँदै गरेको प्र.१–०१–००१ ख ४३५२ नम्बरको आईचर ट्रकलाइ सोमबार अपरान्ह् सवाँ ४ बजे मेचीनगर नगरपालिका १० धुलाबारीमा चेकजाँच गर्दा चालकले डिभिजन वनबाट दिएको ५७२७ र ५७२८ नम्बरको छुट पुर्जी देखाएका थिए ।
सो पुर्जी चेकजाँच गर्दा पुर्जी अनुसारको काठ असार १५ गते आइतबार ११ बजे मेचीनगरनगरपालिका १५ स्थित ज्यामिरगढीमा सञ्चालित सञ्जीवनी प्लाईउड उद्योगमा ढुवानी भईसकेको देखिएको सशस्त्रका डिएसपी सुमन पोखरेलले जानकारी दिए । घटनापछि २० लाख मूल्य बराबरको ट्रक र २ लाख मूल्य बराबरको ३७२ क्युफिट विभिन्न जातका गोलिया कुकाठ र अर्जुनधारा ४ भाङ्बारीका ३७ बर्षीय चालक दिपक दनुवार र सोही स्थानका ३३ बर्षीय सहचालक पदम चौधरीलाइ नियन्त्रणमा लिइ आवश्यक कारबाहीका लागि डिभिजन वन कार्यालय झापा पठाइएको उनले बताए ।
यता डिभिजन वन कार्यालयका वन अधिकृत जीवन पाठकका अनुसार असार १३ गते डेढसय थान कर्मा, वोट धगेरो, रातो सिरिस लगायतको कुकाठ मेचीनगरनगरपालिका १५ स्थित ज्यामिरगढीमा सञ्चालित सञ्जीवनी प्लाईउड उद्योगमा ढुवानीका लागि दुइवटा छुटपुर्जी लगेको बताए । सोही पुर्जीले काठ ओसार–पसार गरेको सूचना प्रहरीले पाएपछि नियन्त्रणमा लिएर सशस्त्र प्रहरीले कार्यालयमा बुझाएको उनले जानकारी दिए ।
घटनापछि मानिस र ट्रकसहित सव डिभिजन वन कार्यालय सुरुङ्गा पठाइएको छ भने घटनाको अनुसन्धानका लागि मेची सव डिभिजनबाट अनुसन्धान अधिकृत सुरज निरौला तोकिएको उनले बताए ।
