झापा । प्रहरीले बुद्धशान्ति –४ का खनिगौडाका ३४ वर्षीय बुलेट किराती भनिने अञ्जेस राईमाथि आगजनीको मुद्धा दायर गरेको छ ।
शनिवार बन्द आव्हानका क्रममा इलामको रोङ गाउँपालिका –४ किटेनीस्थित मेची
राजमार्गमा पराल बोकेको मे१ ज ११४० नम्बरको पिकअपमा आगजनी गरेको आरोपमा
राईलाई हिजो प्रहरीले पक्राउ गरेको हो ।
जिल्ला प्रहरी कार्यालय ईलाम र ईलाका प्रहरी कार्यालय बिर्तामोडबाट
खटिएको संयुक्त प्रहरी टोलीले हिजो दिउँसो ३ बजे अर्जुनधारा –११ नयाँ
बसपार्कबाट राईलाई पक्राउ गरेको जिल्ला प्रहरी कार्यालय इलामका प्रवक्ता
डीएसपी प्रकाश जवेगुले बताए । उनले राईमाथि आगजनीको मुद्धा दायर गरिएको
जानकारी दिए । राई प्रदेश १ पुनः नामांकन संयुक्त संघर्ष समितिका
बुद्धशान्ति संयोजक, राष्ट्र, राष्ट्रियता, धर्म, संस्कृति र नागरिक बचाउ,
अभियानअन्तर्गत नागरिक युवा दस्ताका मेचीनगर संयोजक भएको बुझिएको छ ।
यसैबीच मुख्यमन्त्री केदार कार्कीको गाडीमा तोडफोड गरेको आरोपमा मंगलवार राति पक्राउ परेका नेपाल आदिवासी जनजाति महासंघ झापाका अध्यक्ष पाण्डवलाल चौधरी आज रिहा हुने भएका छन् । उनलाई आज रिहा गर्ने संभावना रहेको प्रहरी स्रोतले जनाएको छ । अभद्र व्यवहारसम्बन्धी मुद्धा दायर गरिएका चौधरीमाथि अनुसन्धान गर्न प्रहरीले दुईपटक म्याद थपेको थियो । पहिलो पटक पाँच दिन र त्यसपछि तीन दिन म्याद थप गरिएको थियो । ८ दिनको म्याद सकिएकाले अब म्याद थप नगरी रिहा गरिने प्रहरी स्रोतले जनाएको छ ।
कांग्रेसका महाधिवेशन प्रतिनिधिसमेत रहेका चौधरीलाई केही दिनअघि नै
रिहा गर्ने भनिएकोमा कोशी प्रदेशका मुख्यमन्त्री केदार कार्कीका कारण उनलाई
थुनामै राखिरहेको बताइएको छ । ‘व्यक्तिगत टसलका कारणले पनि चौधरीको थुना
अवधि लम्बिएको हो’ स्रोतले भन्यो ।
बन्द हड्तालमा उत्रिएका पूर्वमन्त्री गोपाल किरातीसहितका अन्य नेताहरु आइतवार साँझ नै रिहा भइसकेका छन् ।
