झापा / स्वास्थ्य बीमा बोर्डले निजी अस्पताल तथा स्वास्थ्य संस्थालाई आकस्मिक सेवाको नाममा सामान्य बिरामीको उपचार गरी बीमा दाबी पेश नगर्न कडा निर्देशन दिएको छ। बोर्डले वास्तविक आकस्मिक अवस्थाका बिरामीलाई मात्र आकस्मिक सेवा अन्तर्गत उपचार गर्न र अन्य सामान्य बिरामीलाई सोही शीर्षकमा सेवा दिए भुक्तानी नहुने स्पष्ट पारेको हो।
हाल बोर्डले बढ्दो वित्तीय संकटका कारण निजी अस्पतालमा आकस्मिक बाहेकका स्वास्थ्य बीमा सेवा स्थगित गरेको छ। जेठ १६ गतेदेखि लागू हुने गरी निजी स्वास्थ्य संस्थामा आकस्मिक सेवा मात्र सञ्चालन गर्न दिइएको छ भने ओपीडी, नियमित परीक्षण, शल्यक्रिया तथा अन्य गैर–आकस्मिक सेवामा बीमा सुविधा रोकिएको छ।
बोर्डका अनुसार कतिपय स्वास्थ्य संस्थाले सामान्य बिरामीलाई समेत आकस्मिक सेवा देखाएर दाबी पेश गर्ने प्रवृत्ति देखिएकाले यस्तो निर्देशन जारी गरिएको हो। यदि सामान्य प्रकृतिका बिरामीलाई आकस्मिक सेवा अन्तर्गत राखेर उपचार गरिएको पाइएमा त्यस्तो दाबी रकम भुक्तानी नगरिने चेतावनी बोर्डले दिएको छ।
स्वास्थ्य बीमा कार्यक्रम आर्थिक संकटमा परिरहेका बेला बोर्डले सेवा व्यवस्थापन र खर्च नियन्त्रणका लागि यस्तो कदम चालेको जनाएको छ। बोर्डका अनुसार हाल सेवाप्रदायक संस्थालाई करिब १६ अर्ब रुपैयाँभन्दा बढी भुक्तानी गर्न बाँकी रहेको छ। भुक्तानी अभावकै कारण निजी अस्पतालमा बीमासम्बन्धी सेवा कटौती गर्नुपरेको बोर्डको भनाइ छ।
यस निर्णयले निजी अस्पतालमा उपचार गराउँदै आएका लाखौं बीमित नागरिक प्रभावित हुने भएका छन्। स्वास्थ्य क्षेत्रका जानकारहरूले भने आकस्मिक र सामान्य बिरामी छुट्याउने मापदण्ड स्पष्ट नहुँदा सेवाग्राहीले थप सास्ती भोग्न सक्ने चिन्ता व्यक्त गरेका छन्।
