झापा / झापाको बिर्तामोड नगरपालिका–२ स्थित चारपाने चोकमा एक २१ वर्षीया युवतीलाई सार्वजनिक रूपमा बिजुलीको पोलमा बाँधेर कालोमोसो दल्दै दुर्व्यवहार गरेको अभियोगमा प्रहरीले चार जनालाई पक्राउ गरेको छ ।
पुरानो रिसइबी र विवादका कारण स्थानीय २१ वर्षीया सबिना राजवंशीमाथि शुक्रबार साँझ करिब ६:३० बजे केही व्यक्तिहरूको समूहले अमानवीय ढंगले आक्रमण र सार्वजनिक बेइज्जती गरेको प्रहरीले जनाएको छ । घटनाको जानकारी पाउनासाथ इलाका प्रहरी कार्यालय अनारमनीबाट खटिएको विशेष टोलीले दुर्व्यवहारमा प्रत्यक्ष संलग्न रहेका अभियुक्तहरूलाई तत्कालै नियन्त्रणमा लिएको हो ।
प्रहरीका अनुसार पक्राउ पर्नेहरूमा कन्काई नगरपालिका वडा नम्बर ८ बस्ने १८ वर्षीय समिर मुर्मु, २० वर्षीया सबिना मुर्मु, २५ वर्षीया स्वस्तिका मुर्मु र १९ वर्षीया पुजा बस्नेत रहेका छन् । उनीहरूले पीडित राजवंशीको हात बिजुलीको पोलमा बाँधेर जबरजस्ती अनुहारमा कालोमोसो दलेका थिए । सार्वजनिक स्थलमा भएको यस किसिमको गम्भीर र अमानवीय घटनापछि स्थानीय क्षेत्रमा आक्रोश पैदा भएको छ । पक्राउ परेका चारै जना विरुद्ध मुलुकी अपराध संहिता बमोजिम सार्वजनिक दुर्व्यवहार तथा बेइज्जती सम्बन्धी कसुरमा कानुनी प्रक्रिया अगाडि बढाइएको र घटनाका सम्बन्धमा थप अनुसन्धान भइरहेको इलाका प्रहरी कार्यालय अनारमनीले जनाएको छ ।
