झापा / प्रतिनिधि सभाको सभामुख चयन प्रक्रियाअन्तर्गत आज उम्मेदवारी मनोनयन दर्ता गर्ने कार्यक्रम रहेकाे छ। संसद सचिवालयले निर्धारण गरेको समयअनुसार बिहान ११ बजेदेखि दिउँसो २ बजेसम्म मनोनयन दर्ता गरिसक्नुपर्ने व्यवस्था गरिएको छ।
यसबीच डोल प्रसाद अर्याल लाई राष्ट्रिय स्वतन्त्र पार्टी (रास्वपा) ले सभामुख पदका लागि उम्मेदवारका रूपमा अगाडि सारेको छ। अन्य प्रमुख राजनीतिक दलहरूले भने हालसम्म आफ्नो आधिकारिक धारणा सार्वजनिक गरेका छैनन्, जसले गर्दा निर्वाचन प्रतिस्पर्धात्मक हुने कि सहमतिमा टुंगिने भन्ने अन्योल कायम रहेको छ।
संसद सचिवालयका अनुसार मनोनयन दर्ता प्रक्रिया सम्पन्न भएपछि आवश्यक जाँच तथा अन्तिम नामावली प्रकाशन गरिनेछ। त्यसपछि यही वैशाख २२ गते बिहान ११ बजे बस्ने प्रतिनिधि सभा बैठकमा सभामुख पदको निर्वाचन हुने जनाइएको छ।
यदि एकभन्दा बढी उम्मेदवार मैदानमा उत्रिए भने मतदान प्रक्रियामार्फत सभामुख चयन गरिनेछ भने एकमात्र उम्मेदवार रहेमा निर्विरोध निर्वाचित हुने सम्भावना रहनेछ।
