झापा । झापाको भद्रपुरमा आज बिहान एउटा जंगली हात्ती मृत फेला परेको छ ।
भद्रपुर नगरपालिका– २ स्थित कमलधाप रामपोखरी सामुदायिक वन
कार्यालयनजिकै गहिरो नालीमा डुबेको अवस्थामा हात्ती मृत भेटिएको जिल्ला
प्रहरी कार्यालय झापाका डीएसपी खगेन्द्रप्रसाद रिजालले जानकारी दिए ।
स्थानीयले मृत हात्ती देखेपछि प्रहरीलाई खबर गरेका थिए ।
हात्ती मृत फेला परेपछि जिल्ला प्रहरी कार्यालय झापाका एसपी दुर्गाराज
रेग्मी र डीएसपी रिजाल घटनास्थल पुगेका थिए । ‘वयस्क हात्ती चौडाइ कम भएको
गहिरो नालीमा फसेको देखियो,’ डीएसपी रिजालले भने, ‘नालीबाट निस्किन
हात्तीले निक्कै प्रयास गरेको देखिन्छ, अगाडिको खुट्टा हिलोपानीमा दबेकोले
निस्किन सकेन, र त्यहाँ नै मृत्यु भयो ।’
घटनास्थलमा प्रहरी र डिभिजन वन कार्यालय झापाको टोली पुगिसकेको उनले बताए । कोशी टप्पु वन्यजन्तु आरक्षबाट चिकित्सकको टोली आएकाे उनले जनाए । झापामा अहिलेसम्म १८ वटा हात्तीको मृत्यु भइसकेको छ ।
