झापा । पाँचथरमा भदौ दोस्रो साता बम विस्फोटमा परी ज्यान गुमाएका नाबालक दाजुबहिनीको परिवारलाई सरकारले आर्थिक सहायता दिने भएको छ । कात्तिक ८ गते बसेको मन्त्रिपरिषद् बैठकले साँवा परिवारलाई एकाघरको परिवारलाई प्रतिपरिवार बिलबमोजिम बढीमा ५ लाखका दरले आर्थिक सहायता उपलब्ध गराउने निर्णय गरेको हो ।
भदौ १४ गते पाँचथरको फालेलुङ गाउँपालिका–५, डाँडागाउँका दिप्सन साँवा र प्रिन्सा साँवाको बम विस्फोटमा मृत्यु भएको थियो । खेल्ने क्रममा दिउँसो करिब ३ बजे भएको द्वन्दकालिन बम विष्फोटमा ४ जना बालबालिका परेका थिए । घर नजिकै अम्रिसो बारीमा भेटिएको वस्तुलाई खेलौना जस्तो ठानेर बालबालिकाले खोल्न खोज्दा विस्फोट भएको थियो । त्यसमा अढाइ वर्षीया प्रिन्सा साँवा र ११ वर्षीय दिप्सन गम्भीर घाइते भएका थिए ।
घाइते साँवा दाजुबहिनीलाई उपचारका लागि अस्पताल लगिए पनि उपचारका क्रममा उनीहरुको मृत्यु भएको थियो । बिहीबार बसेको मन्त्रिपरिषद् बैठकले उनीहरुको उपचारमा लागेको खर्चको बिलका आधारमा बढीमा ५ लाख रुपैयाँसम्म सहायता दिने निर्णय गरेको हो । उनीहरुलाई आर्थिक सहायता उपलब्ध गराउन नेकपा माओवादी केन्द्र कोशीका संसदीय दलका नेता इन्द्र आङ्बो (मौसम)ले आग्रह गरेका थिए ।
