झापा । झापा बिर्तामोडको डोमालाल राजवंशी रंगशालामा सुरु भएको प्रथम झापा कप फुटबल प्रतियोगिताको उद्घाटन खेलमा त्रिभुवन आर्मी फुटबल क्लबले विजयी सुरुवात गरेको छ ।
आर्मीले मोरङको एलएक्स सिटी एफसीलाई ३–० गोल अन्तरले पराजित गर्दै क्वाटरफाइनलमा स्थान सुरक्षित गरेको हो ।
आर्मीका
लागि राष्ट्रिय टिमका स्ट्राइकरसमेत रहेका नियमित खेलाडी जिलेस्पीजंग
कार्की र दिशान्त राईले गोल गरे । खेलको २५औँ मिनेटमा आर्मीका स्ट्राइकर
कार्कीले मोरङका डिफेन्डर अगाडि बढेको अवस्थामा गोल गरेका थिए । मैदानको
मध्यभागमा सिंगल खेल्दै बललाई पोस्टको दिशा दिए ।
आर्मीका लागि अर्काे गोल खेलको ८२ औँ मिनेटमा सम्भव भयो । वैकल्पिक
खेलाडी दिशान्त राईले निरज घिसिङको पासमा गोल गर्दै अग्रता दोब्बर बनाए ।
खेलको अन्तिम समयमा निरज चौधरीले गोल थप्दै आर्मीको जित सुनिश्चित गरेका
हुन् ।
मोरङका डिफेन्डरको कमजोरीको फाइदा उठाउँदै चौधरीले गरेको प्रहार गोलरक्षक अरुण ब्लोनले बचाउन सकेनन् ।
खेलमा
मोरङले खासै मुभ बनाउन सकेन । खेलको ४७ औँ मिनेटमा अनमार्क रहेका दिपेश
आलेमगरले विपक्षी पोस्टमा पाएको बल सदुपयोग गर्न नसक्दा बराबरी गर्ने अवसर
गुमेको थियो ।
खेलको प्लेयर अफ द म्याच आर्मीका दिशान्त राई घोषित भए । उनले नगद १० हजार पुरस्कार पाए ।
आइतबारको खेल आयोजक झापा ११ फुटबल क्लब र राष्ट्रिय जागृति क्लब इटहरीबीच हुने आयोजकले जनाएको छ ।
प्रतियोगिताको
फाइनल खेल पुस ८ गते हुनेछ । प्रतियोगिताको विजेताले नगद १० लाख तथा
उपजिेताले नगद ५ लाख पुरस्कार पाउने आयोजक झापा ११ फुटबल क्लबका महासचिव
गणेश पोखरेलले जानकारी दिए । प्रतियोगितामा नेपालका ९ र भारतको एउटा क्लबको
सहभागिता रहेको छ ।
मुख्यमन्त्रीद्वारा उद्घाटन
कोशी प्रदेशका मुख्यमन्त्री हिक्मत कार्कीले प्रतियोगिताको उद्घाटन
गरेका थिए ।प्रतियोगिताको उद्घाटन गर्दै मुख्यमन्त्री कार्कीले स्तरीय
क्लबले आयोजना गरेको झापा कप प्रतियोगितामा प्रदेश सरकारले उचित सहयोग गर्न
नसकेको बताए ।
उनले प्रदेशको स्रोतले भ्याएसम्म यो प्रतियोगितालाई
सहयोग गर्ने बचनबद्धता समेत प्रकट गरे । उनले डोमालाल राजवंशी रंगशालालाई
सुविधासम्पन्न रंगशाला बनाउने योजना प्रदेश सरकारको रहेको सुनाए ।
उद्घाटन कार्यक्रममा प्रतिनिधिसभाका सांसद एलपी साँवा,
नेपाली कांग्रेसका सभापति देउकुमार थेवे, जिल्ला समन्वय समितिकी उपप्रमुख
शान्ता रोक्का, अर्जुनधारा नगरपालिकाका प्रमुख बलदेवसिंह गोम्देनलगायतको
आतिथ्यता रहेको थियो ।
बिर्तामोडका फुटबलप्रेमीहरुको चाहना अनुसार यो
वर्षदेखि झापा कप आयोजना हुन थालेको हो । झापा गोल्डकप आयोजना गर्दै आएको
समूहले नै झापा कप आयोजना गरेको हो ।
