झापा । बिर्तामोड नगरपालिकाविरुद्ध शानदार खेल खेल्दै अर्जुनधारा नगरपालिका प्रथम अन्तर पालिका जिल्लास्तरीय लिग तथा नकआउट फुटबल प्रतियोगिताको सेमिफाइनलमा प्रवेश गरेको छ ।
आज भएको तेस्रो क्वार्टर फाइनल खेलमा अर्जुनधाराले बिर्तामोडमाथि निकै
नै दबाब राख्दै फराकिलो जित दर्ता गरेको हो । खेलको अधिकांश समय
अर्जुनधाराले गोल नियन्त्रणमा राखेको थियो ।
अर्जुनधाराले बिर्तामोडलाई ५–० गोल अन्तरले हराएको हो । खेलको १९ औँ र
२८ औँ मिनेटमा निखिल तामाङले गोल गरे । त्यस्तै, ४२ औँ मिनेटमा सुवासचन्द्र
लिम्बू, ४७ औँ मिनेटमा राजेश दाहाल र ७४ औँ मिनेटमा प्रतिक कन्दङ्वाले गोल
गरेका थिए ।
खेलको प्लेयर अफ दि म्याच भएका अर्जुनधाराका निखिल तामाङ भए । उनलाई
झापा जिल्ला खेलकुद विकास समितिका अध्यक्ष प्रशान्त भण्डारी, अर्जुनधाराका
नगरप्रमुख बलदेवसिंह गोम्देन, झापाका प्रहरी प्रमुख दुर्गाराज
रेग्मीलगायतले नगद दुई हजार र ट्रफी प्रदान गरे ।
त्यस्तै, आजको अन्तिम क्वार्टर फाइनल खेलमा मेचीनगर नगरपालिका विजयी
भएको छ । जितसँगै मेचीनगर पनि सेमिफाइनलमा प्रवेश गरेको छ । फाइनल प्रवेशका
लागि उसले अर्जुनधाराको सामना गर्नेछ ।
मेचीनगरले गौरादह नगरपालिकालाई २–१ गोल अन्तरले हराएको हो । खेल अवधिभर
दुवै पालिकाबीच कडा प्रतिस्पर्धा भएको थियो । रोमाञ्चक खेलको ३८ औँ मिनेटमा
मेचीनगरका अजय राजवंशीले गोल गर्दै टिमलाई अग्रता दिलाएका थिए ।
तर,
खेलको ६५ औँ मिनेटमा गौरादहका पासाङ लामाले गोल गर्दै खेल बराबरीमा
फर्काएका थिए । त्यसपछि खेलको ७३ औँ मिनेटमा मेचीनगरका लागि अजय राजवंशीले
अर्को गोल थपेपछि मेचीनगरको सेमिफाइनल यात्रा टुंगो लागेको थियो ।
खेलको प्लेयर अफ दि म्याच मेचीनगरका अजय राजवंशी भए । उनलाई गोल्डकपका
अध्यक्ष दिपेश ढकाल, झापा उद्योग संघका निवर्तमान अध्यक्ष यामबहादुर
श्रेष्ठ, नेपाल भारत मैत्री संघका अध्यक्ष प्रदिपमणि रेग्मीले नगद दुई हजार
र ट्रफी प्रदान गरे ।
फुटबलको उर्वरभूमि झापाबाट युवा खेलाडी उत्पादन गर्ने उद्देश्यले आयोजना भएको प्रतियोगिताको दुवै सेमिफाइनल खेल मंसिर २२ गते र फाइनल खेल मंसिर २४ गते हुने महासचिव जीवनकुमार श्रेष्ठले जानकारी दिए । प्रतियोगिताको विजेताले नगद ३ लाख, ट्रफी, मेडल र प्रमाणपत्र पाउनेछ भने उपविजेताले नगद २ लाख, ट्रफी, मेडल र प्रमाणपत्र प्राप्त गर्नेछ । प्रत्येक खेलको प्लेयर अफ द म्याचले नगद २ हजार रुपैयाँ पाउने छन् । त्यस्तै, उत्कृष्ट गोलकिपर, उत्कृष्ट प्रशिक्षक, उच्च गोलकर्ता र उदीयमान खेलाडीले नगद ५ हजार रुपैयाँ, ट्रफी र मेडल प्राप्त गर्ने छन् ।
