झापा / झापामा अत्यधिक रुपले लागूऔषधको प्रयोग, दुर्व्यसन र ओसार –पसार बढेर गएको भन्दै पूर्व प्रहरी सङ्गठन नगर समिति भद्रपुर झापाले सचेतना अभियानलाई निरन्तरता दिदै आईरहेको छ । लागूऔषध दुर्व्यसन न्यूनिकरणका लागि सो समितिले भद्रपुर नगरपालिकासँग समन्वय गरेर विद्यालय स्तरमा विद्यार्थीहरुलाई सचेतना जगाउँदै न्यूनिकरणका लागि कार्यक्रम सञ्चालन गरिरहेको हाे ।
समितिले आइतबार भद्रपुर २ चारालीमा रहेकाे हाेलील्याण्ड इङ्लिस स्कुलमा अध्ययनरत कक्षा ९ र १० का छात्र–छात्राहरुलाई भद्रपुर नगरपालिकाको आर्थिक सहयोगमा एक दिने लागूऔषध दु्र्व्यसन विरुद्ध विद्यालयमा सचेतना कार्यक्रम सम्पन्न गरेकाे छ ।
सचेना कार्यक्रममा नगर उपप्रमुख राधा कार्कीले विद्यार्थीहरुलाई यस कार्यक्रममा भनिएका कुरा व्यवहारमा उतारे यस्ताे कुलतमा नफस्ने बताइन् । कार्यक्रममा जिल्ला प्रहरी कार्यालय झापाका इन्स्पेक्टर प्रविण श्रेष्ठले लागूऔषधकाे सेवन गरे या ओसारपसार गरेमा हुने कानुनी कारवाहीकाे बारेमा जानकारी दिएका थिए । उनका अनुसार झापामा अहिले ८० प्रतिशत मुद्दा लागुऔषधका रहेकाे जानकारी दिदै गत ३ वर्षकाे अवधिमा याे प्रकृतिका मुद्दा बढ्दै गएकाे बताए ।
कार्यक्रममा बाेल्दै वडा नं. २ का वडाध्यक्ष राम बहादुर कँडेलले लागुऔषध अत्यन्तै हानिकारक भएकाेले कुनै हालतमा पनि यसकाे नजिक नपर्न विद्यार्थीलाई आग्रह गरेका थिए ।
पुर्व डिएसपी विनाेद निराैलाले विद्यार्थीहरुलाई लागू औषधमा कसरी फसिन्छ, यसको सुरुवाती कसरी हुन्छ र यसका असरहरु के कस्ता हुन्छन् भन्ने बारेमा प्रशिक्षण दिएका थिए ।
समितिका अध्यक्ष अम्विका पोखरेलको सभापतित्वमा भएको कार्यक्रममा सचिव राजकुमार थापाले सहजीकरण गरेका थिए ।
कार्यक्रममा पूर्व प्रहरी सङ्गठनका पदाधिकारी ,शिक्षक, विद्यार्थी, विभिन्न संघ संस्थाका प्रमुख तथा प्रतिनिधि लगायतको उपस्थिति रहेको थियो ।
