राजस्व अनुसन्धान मार्फत काँकडभिट्टामा छापा मारेर एक करोडको सामान बरामद

झापा ।  भन्सार छलेर भित्राइएको ठूलो परिमाणको लत्ताकपडा र मोटरपार्टस सशस्त्र प्रहरीले राजश्व अनुसन्धानको टोली बोलाएर छापा मारेकाे छ । राजश्व अनुसन्धान कार्यालय इटहरीका अनुसन्धान अधिकृत विदुर गौतम र गणका डीएसपी मदनकुमार रसाइलीको नेतृत्वमा खटिएको संयुक्त टोलीले मङ्गलबार बिहान करिब ६ बजे मेचीनगर–६ स्थित झिल्केघाम टोल निवासी मदन पोखरेल र सोही ठाउँका उत्तम ठकुरीको घरमा छापा मारेको हाे ।
पोखरेलको घरबाट ३९ बोरा र ठकुरीको घरबाट २० बोरा गरी ५९ बोरा सामान बरामद गरिएको सशस्त्र प्रहरी बल, नेपाल नं २ गण हेक्वा झापाका डीएसपी सुमन पोखरेलले बताए । बरामद गरिएको सामान आवश्यक कारबाहीका लागि राजश्व अनुसन्धान कार्यालय इटहरी पठाएको डीएसपी पोखरेलले बताए । अनुमानित एक करोड मूल्य बराबरकाे सामान बरामद गरेकाे उनले जनाए । बरामद गरिएको सामान मुना तामाङ्को भएको प्रहरीले जनाएको छ ।

सशस्त्र प्रहरी बल, नेपाल प्रस्तावित सीमा सुरक्षा गुल्म काँकडभिट्टा, बोर्डर आउट पोस्ट नकलबन्दा, इलाका प्रहरी कार्यालय काँकडभिट्टा र नकलबन्दा प्रहरी चौकी लगायतको सेटिङमा तस्करी भइरहेको याे घटनाले पुष्टि गरेकाे छ । 
 
सशस्त्र प्रहरी बल, नेपाल प्रस्तावित सीमा सुरक्षा गुल्म काँकडभिट्टा, सशस्त्र प्रहरी बल, नेपाल नम्बर २ गण हेक्वा झापा ,इलाका प्रहरी कार्यालय काँकडभिट्टाका सादा पोसाकमा खटिएका प्रहरीको संलग्नतामा कारोबारीहरूले खुलेआम तस्करी धन्दा चलाइरहेको बुझिएको छ ।

सादा पोसाकमा खटिएका सशस्त्र र नेपाल प्रहरीकै सेटिङ मेचीनगर–६ स्थित पुरानो मेची पुलमाथि र मेचीनगर नगरपालिका–७ सतिघट्टाको गैरीगाउँबाट अहिले पनि ठूलो मात्रामा लत्ताकपडा, किराना , लाइटर, कवाडी लगायतको काम भइरहेको पाइएको छ । कारोबारीले भन्सार छलेर दिनहुँ लाखौँ मूल्य बराबरको सामान भित्राउने र पठाउने काम गरिरहेका छन् । 

केही समयअघि मात्र सतिघट्टा नाकाबाट भित्राइएको भन्सार छलीका सामान सशस्त्रले राजमार्गमा बरामद गर्न खोज्दा पिन्टु साहले घेराबन्दी गरी पिकअपसहितको सामान लिएर फरार भएका थिए । त्यसपछि सशस्त्रले प्रहरीमा उजुरी हालेर कारोबारी साहलाई पक्राउ गर्न लगाएर अभद्र व्यवहारमा मुद्दा चलाउन लगाएका थिए । कारोबारी साह दुई साता इलाका प्रहरी कार्यालय काँकडभिट्टाको हिरासतमा बसेर हाल धरौटीमा रिहा भएका छन् ।