झापा । दमक नगरपालिकाले आगामी आर्थिक बर्ष २०८१/०८२ का लागि एक अर्ब ६२ करोड ७७ लाख ५८ हजार रुपैयाँ बराबरको बजेट प्रस्तुत गरेकाे छ । नगर उपप्रमुख उपप्रमुख रेगिना भटट्राई प्रसाइँले आइतबार बजेट प्रस्तुत गरेकी हुन् ।
सो अवसरमा दमकको अस्तित्व, बढाउँछ सुरक्षित मातृत्व भन्ने नीति अंगिकार गर्दै सुरक्षित मातृत्व बिकासको कार्यक्रम सञ्चालन गरिने उपप्रमुख भटट्राईले उल्लेख गरिन् । सोही अन्तर्गत विपन्न, दलित, असहाय तथा अपागंता भएका व्यक्तिहरुबाट नियमानुसार जन्मदर्ता गराइएका बालबालिकाहरुलाई एक पटकका लागि बैंक खाता खोल्न ४ हजार रुपैयाँ एकमुष्ट रकम उपलब्ध गराइने पनि उपप्रमुख भटट्राईले उल्लेख गरिन् ।
त्यस्तै उपमेयर सुरक्षित महिनावारी कार्यक्रम सञ्चालन गर्ने, आमा तथा बच्चाको स्वास्थ्य सुरक्षित गराउन पिएनसी होम भिजिट कार्यक्रम सञ्चालन गरिने, मोतिया विन्दुको समस्या भएका बिरामीको उपचार निशुल्क गर्ने कार्यक्रम पनि नगरले ल्याएको छ । दमकका जनता आधारभुत स्वास्थ्य सेवाका लागि जानुपर्दैन अन्त भन्ने नारासहित मानसिक रोगसहित अन्य नसर्ने रोगको रोकथामका लागि कार्यक्रम सञ्चालन गर्नेसहित विभिन्न १६ वटा कार्यक्रम अघि सारिएको छ । १० बर्ष सेवा गरि निवृत्त हुने महिला स्वास्थ्य स्वयंसेविकालाई दिइँदै आएको ८० हजार रुपैयाँलाई बढाएर एक लाख बनाउने प्रस्ताव गरिएको छ ।
