झापाको भद्रपुरमा खुकुरी तथा धारिलो हतियार देखाउँदै गुण्डागर्दी गरेको आरोपमा दुई जनालाई प्रहरीले पक्राउ गरेको छ।
जिल्ला प्रहरी कार्यालय झापाका अनुसार २०८३ असार २८ गते राति करिब ९ बजे भद्रपुर नगरपालिका–८ स्थित एक होटलमा केही व्यक्तिहरूले धारिलो हतियार (खुकुरी) देखाएर आतंक सिर्जना गरिरहेको सूचना प्राप्त भएपछि प्रहरी टोली खटिएको थियो। प्रहरी पुगेको थाहा पाएपछि उनीहरू फरार भएका थिए।
घटनाको अनुसन्धान तथा खोजतलासका क्रममा भोलिपल्ट असार २९ गते दिउँसो करिब ४ बजे भद्रपुर नगरपालिका–१० स्थित जिल्ला निर्वाचन कार्यालय अगाडिबाट दुई जनालाई नियन्त्रणमा लिइएको जिल्ला प्रहरी कार्यालय झापाले जनाएको छ।
पक्राउ पर्नेहरूमा मेचीनगर नगरपालिका–१० निवासी ३६ वर्षीय कविराज गुरागाईं र बिर्तामोड नगरपालिका–७ निवासी ३० वर्षीय पराजय चौधरी रहेका छन्।
प्रहरीका अनुसार पक्राउ परेका दुवै जना जिल्ला निर्वाचन कार्यालय झापामा कार्यरत कर्मचारी रहेको खुलेको छ। उनीहरूको साथबाट एक थान खुकुरी बरामद गरिएको प्रहरीले जनाएको छ।
घटनाबारे थप अनुसन्धान भइरहेको जिल्ला प्रहरी कार्यालय झापाले जानकारी दिएको छ।
