झापा । दक्षिणी नाकाबाट लागूऔषध भित्र्याउन खोज्ने अर्का भारतीय पक्राउ परेका छन् ।
हिजो साँझ ६.३० बजेको समयमा झापा गाउँपालिका वडा नं. ५ पन्थापाडाबाट
भारत बिहार राज्य किशनगंज जिल्ला धनतौला ग्राम पञ्चायत वार्ड नं. १ बस्ने
३२ वर्षीय तनविर आलम पक्राउ परेकाे जिल्ला प्रहरी कार्यालय झापाले जनाएकाे छ । बीओपी पन्थापाडाबाट खटिएको
सशस्त्र प्रहरीले चेकप्वाईन्टमा चेकजाँच गर्ने क्रममा भारतबाट नेपालतर्फ
आउँदै गरेको बीआर ३७ एच ९५५५ नम्बरको भारतीय मोटरसाइकललाई शंका लागेर
चेकजाँच गर्दा मोटरसाइकलमा सवार आलमको साथबाट प्लाष्टिकबाहेक ५ ग्राम ४८०
मिलिग्राम ब्राउनसुगर र नेपाली रुपैयाँ ३९ हजार १०० फेला परेको जिल्लाका डिएसपी कृष्णकुमार चन्दले जानकारी दिए ।
उनलाई पक्राउ गरी प्रहरी चौकी शरणामतीमा राखिएको छ । त्यस सम्बन्धमा थप अनुसन्धान कार्य जारी रहेको उनले जनाए ।
