धरमपुर, बैशाख ४ । धरमपुर बचत तथा ऋण सहकारी संस्थाले शिवसताक्षी नगरपालिकालाई ६० हजार रुपैयाँ सहयोग गरेको छ ।
नगरले गठन गरेको कोरोना भाईरस रोकथाम , नियन्त्रण तथा राहत व्यवस्थापन कोषमा जम्मा हुने गरी सो रकम उपलब्ध गराइएको संस्थाका व्यवस्थापक विनोद ढकालले जानकारी दिए । संस्थाका अध्यक्ष दिपकुमार श्रेष्ठ, उपाध्यक्ष कुमार शंकर , सञ्चालक सदस्य देवराज राई,व्यवस्थापक ढकालसहितको टोलीले कार्यकक्षमा नै पुगेर नगरप्रमुख चन्द्रकुमार शेर्मा र उपप्रमुख भोजकुमारी नेपाललाई सो रकम बराबरको चेक हस्तान्तरण गरेको जनाइएको छ ।यसैबीच संस्थाले झापामा नै पहिलो पटक सेयर सदस्यलाई आपतकालीन सहायता ऋण उपलब्ध गराउने नीति लिएको व्यवस्थापक ढकालले जानकारी दिए । ४६५ जना सेयर सदस्य रहेको सहकारीले शिवसताक्षी — १ मा रहेको मुख्य कार्यालय र मंगलबारे सेवाकेन्द्रबाट सो सेवा उपलब्ध गराउने छ । यो दुई महिने आपतकालीन सापटी ऋण सेवा भएको संस्थाले जनाएको छ । सो सापटी ऋण बढीमा १५ हजारसम्म उपलब्ध गराइने व्यवस्थापक ढकालले जानकारी दिए । ‘ यो कार्यक्रम पहिलो र नौलो हो’ व्यवस्थापक ढकालले भने,‘ कोरोना संक्रमणको त्रासदी र अहिलेको आपतको समयमा आफ्ना सदस्यलाई सहयोग गर्नु सहकारीको पहिलो दायित्व हो ।’ उक्त सेवा सञ्चालनका लागि संस्थाले निश्चित कार्यविधि आधार तयार गरेको जनाइएको छ ।
