झापा । क्षमताभन्दा दोब्बर बढी कैदी र थुनुवा रहेकाे नेपालकै सबैभन्दा पुरानो र ठूलो जेलको रूपमा रहेको जगन्नाथ
देवलमा रहेका थुनुवा र कैदी गरी १६ सय जना एकैपटक बिरामी परेका छन् ।
जेलमा रहेका कैदी र थुनुवा गरी ३ हजार ७ सय ५४ जनामध्ये एकैपटक १६ सय जना बिरामी परेको जेल प्रशासन स्रोतले जानकारी दिएको छ ।
जेल प्रशासनका अनुसार सो जेलको जम्मा क्षमता भने १५ सय जनाको मात्रै रहेको छ । तर, अहिले जेलमा क्षमताभन्दा दोब्बर बढी कैदीहरू राख्नुपरेको जेलका प्रमुख जेलर कृष्णबहादुर कटुवालले जानकारी दिए ।
जेलर कटुवालका अनुसार सबैभन्दा बढी समस्या बिरामीहरूको उपचार र व्यवस्थापनमा पर्ने गरेको छ । अहिले कैदी र थुनुवा गरी १६ सय जना विभिन्न रोगका कारण बिरामी भएकाले उनीहरूको उपचारमा समस्या परिरहेको कटुवालले बताए ।
बिरामीहरूलाई प्रारम्भिक उपचार जेलभित्रै गर्ने गरिएको छ तर गम्भीर रोग र दीर्घ रोगबाट पीडित बनेका बिरामीहरूलाई भने वीर, टिचिङलगायतका सरकारी अस्पतालमा लगेर उपचार गर्ने गरिएको छ । नेपाल समाचारपत्रबाट
