झापा / जिल्लाबाट एकल सिफारिस गरिएका उम्मेदवारलाई बेवास्ता गर्दै केन्द्रले अर्कैलाई टिकट दिएपछि तेह्रथुम रास्वपाका नेता तथा कार्यकर्ताले सामूहिक राजिनामा दिने तयारी गरेका छन् ।
सिफारिस गरिएका उम्मेदवार इञ्जिनियर सुरेन्द्र कार्कीलाई बेवास्ता गर्दै सोमबार केन्द्रले रितुराज लिम्बूलाई टिकट दिएपछि जिल्लामा असन्तुष्टि जनाउदै कार्यकर्ताहरुले सामूहिक राजिनामा दिन तयार गरेका हुन् ।
जिल्ला कार्यसमितिले सिफारिस नगरेका र पार्टी गतिविधिमा संलग्नता नदेखिएका व्यक्तिलाई अचानक टिकट दिइनु पार्टीको विधि र मर्मविपरीत भएको रास्वपा तेह्रथुमले ठहर गरेको छ ।
यस निर्णयप्रति गम्भीर असहमति जनाउँदै जिल्ला नेतृत्वले मिति २०८२/१०/०४ सम्म सदस्यता लिएका सबैले सामूहिक राजीनामा दिने तयारी गरिएको एक नेताले जानकारी दिए ।
उनका अनुसार सिफारिस गरिएका उम्मेदवार कार्कीलाई स्वतन्त्र उम्मेदवारका रूपमा चुनावी मैदानमा उतार्ने तयारी भइरहेको पनि जानकारी दिएका छन् ।
पार्टी केन्द्रको निर्णयप्रति जिल्लास्तरबाट तीव्र असन्तोष देखिन थालेपछि रास्वपाभित्र आन्तरिक विवाद थप चर्किने संकेत देखिएको छ ।
