झापा / कैलालीमा श्रीमानले गाेली हानेर आफ्नै श्रीमतीकाे हत्या गरेका छन् भने हत्या पछि उनले आफैलाई गाेली हानेर घाइते भएका छन् ।
गोदावरी नगरपालिका–४ अमेलेशैनीगाउँका ३१ वर्षीय रामबहादुर मगरले आफ्नी श्रीमती २७ वर्षीया सञ्जिता मगरलाई भरुवा बन्दुकले गोली हानी हत्या गरेपछि आफैमाथि गोली प्रहार गरेर घाइते भएका हुन्।
गोली लागेर श्रीमतीकाे घटनास्थलमै मृत्यु भएको छ।
घाइते रामबहादुरलाई बेहोस अवस्थामा सेती प्रादेशिक अस्पताल धनगढी पुर्याइएको जिल्ला प्रहरी कार्यालय कैलालीका प्रवक्ता योगेन्द्र तिमिल्सिनाले जानकारी दिए।
बुधबार अपराह्न गाउँ नजिकैको जङ्गलमा बाख्रा चराइरहेका बेला श्रीमती सञ्जितासँग रामबहादुरले विवाद गरी आफ्नो साथमा रहेको भरुवा बन्दुकले गाेली प्रहार गरेको प्रहरी प्रवक्ता तिमिल्सिनाले जानकारी दिए।
'गए राति स्थानीयवासीले जानकारी दिएपछि प्रहरी टोली घटनास्थल पुगेर अनुसन्धान थालेको छ, घटना भएको समय यकिन भइसकेको छैन,' उनले भने।
मृतक महिलाका माइती पक्ष आएपछि मात्र शव उठाउने तयारी भइरहेको छ।
