झापा / इरानले अन्तर्राष्ट्रिय सम्झौता उल्लङ्घन भए त्यसको सम्पूर्ण जिम्मेवारी अमेरिकाले वहन गर्नुपर्ने चेतावनी दिएको छ। इरानी अधिकारीहरूले सम्झौताको पालना सबै पक्षले समान रूपमा गर्नुपर्नेमा जोड दिँदै कुनै पनि एकपक्षीय कदमले क्षेत्रीय तनाव थप बढाउन सक्ने बताएका छन्।
अल जजिराका अनुसार इरानका विदेशमन्त्री अब्बास अराघचीले शुक्रबार पाकिस्तानी विदेशमन्त्री इशाक डारसँगको टेलिफोन वार्तामा यस्तो बताएका हुन्।
अमेरिकी राष्ट्रपति डोनाल्ड ट्रम्पले अमेरिका बाध्यताले नभई इरान आफैँ वार्ताको टेबुलमा आएको दाबी गरेका छन्। आगामी ६० दिनसम्म इरानले अमेरिकाबाट एक पैसा पनि नपाउने उनले बताए।
इरानको भनाइअनुसार यदि सहमति विपरीत निर्णय वा हस्तक्षेप गरियो भने त्यसबाट उत्पन्न हुने राजनीतिक तथा सुरक्षा परिणामको जिम्मेवारी अमेरिकाले लिनुपर्नेछ। पछिल्ला घटनाक्रमसँगै मध्यपूर्व क्षेत्रमा तनाव बढिरहेका बेला इरानको यो अभिव्यक्तिलाई अन्तर्राष्ट्रिय स्तरमा महत्वका साथ हेरिएको छ।
यस विषयमा अमेरिकाबाट भने तत्काल कुनै औपचारिक प्रतिक्रिया सार्वजनिक भएको छैन। विश्लेषकहरूले दुवै पक्षबीचको तनावले क्षेत्रीय स्थिरतामा असर पार्न सक्ने बताएका छन्।
