साङ्केतिक तस्वीर
झापा । झापाको बिर्तामोड नगरपालिका–४, नयाँबारी टोलस्थित एक घरबाट लागुऔषधसहित एक युवक पक्राउ परेका छन्।
पक्राउ पर्नेमा २२ वर्षीय निजाम मिया रहेकाे प्रहरीले जानकारी दिएकाे छ ।
प्राप्त विशेष सूचनाको आधारमा इलाका प्रहरी कार्यालय बिर्ताबजारबाट प्रहरी निरीक्षक पदम बिष्टको कमाण्डमा खटिएको टोलीले सुगन्धा मण्डलको घरमा खानतलासी गर्दा, उनले छोरा बनाई राखेका मियाको साथबाट लागुऔषध जस्तो देखिने खैरो हिरोइन बरामद गरिएको जिल्ला प्रहरी कार्यालय झापाले जनाएकाे छ ।
प्रहरीका अनुसार मियाको खल्तीबाट प्लाष्टिकमा पोको पारिएको अवस्थामा खैरो हिरोइन जस्तो देखिने लिसिलो पदार्थ ३ ग्राम १८० मिलिग्राम, र प्लाष्टिक बाहेकको अवस्थामा थप १ ग्राम ४४० मिलिग्राम फेला परेको जिल्लाका डिएसपी खगेन्द्रबहादुर खड्काले जानकारी दिए ।
पक्राउ परेका मियालाई थप अनुसन्धानका लागि इलाका प्रहरी कार्यालय अनारमनीमा ल्याइएको प्रहरीले जानकारी दिएको छ। घटनासम्बन्धी विस्तृत अनुसन्धान जारी रहेको जनाइएकाे छ।
