साङ्रकेतिक तस्वीर
झापा । आमा छोराको इलाममा एकैदिन मृत्यु भएको छ ।
आमाको लडेर मृत्यु भएको हो भने छोराले झुन्डिएर आत्महत्या गरेकाे जिल्ला प्रहरी कार्यालय इलामले जनाएकाे छ । । आज बिहान ६ः३० बजे इलाम सन्दकपुर–४ सोमबारे बस्ने ओमभक्त सिवाकी श्रीमती ५७ वर्षीया मनमाया सिवा आफ्नै घरदेखि अन्दाजी ५० मिटर दक्षिण बाटोमा उतानो परी मृत अवस्थामा फेला परेकी थिइन् । घटनाबारे जानकारी प्राप्त हुनसाथ प्रहरी चौकी माबुबाट प्रहरी नायव निरीक्षक बेदबहादुर खड्काको टोली खटिएको थियो । मृतकमा बाहिरी चोट देखिएको छैन । उनले मादक पदार्थ सेवन गर्ने गरेकी थिइन् ।रुघा मर्कीको बिरामी भई धामीकोमा जाँदै गर्दा मृत फेला परेको बुझिएको छ । अनुसन्धान तथा कानुनी प्रकृयाको लागि जिल्ला प्रहरी कार्यालय इलामबाट प्रहरी निरीक्षक संजिव बोगटीको कमाण्डमा टोली खटिएको छ ।
त्यस्तै आज दिउँसो अन्दाजी १२ः१५ बजे मनमायाका छोरा सन्दकपुर ४ घर भई इलाम नगरपालिका –७ नबिन चौकस्थित बिष्णु के.सी.को घरमा भाडा लिई बसेका ३३ वर्षीय कमल सिवाले झुन्डिएर आत्महत्या गरेका छन् । घर कोठामा कोही नभएको समयमा कोठा बन्द गरी छानाको काठको बलोमा प्लास्टिकको डोरीको पासो लगाई उनी झुन्डिएका हुन् । जिल्ला प्रहरी कार्यालय इलाममा खबर प्राप्त हुनसाथ अनुसन्धान तथा कानुनी प्रकृयाको लागि प्रहरी निरीक्षक बोगटीको कमाण्डमा प्रहरी टोली खटिएको थियो । दुबै लाशको कानुनी प्रकिया पुरा भएर शव जिल्ला अस्पताल इलाम पठाएको जिल्ला प्रहरी कार्यालय इलामले जनाएको छ ।
