झापा / सर्वोच्च अदालतले माओवादी उपाध्यक्ष एवं पूर्व सभामुख अग्निप्रसाद सापकोटा विरुद्धको ज्यान मुद्दामा अनुसन्धान अघि बढाउन आदेश दिएको छ ।
प्रधानन्यायाधीश प्रकाशमानसिंह राउत तथा न्यायाधीशहरु सपना प्रधान मल्ल, कुमार रेग्मी, मनोजकुमार शर्मा र कुमार चुडालको इजलासले सापकोटा विरुद्धको ज्यान मुद्धालाई अगाडि बढाउन उत्प्रेषणको आदेश दिएको हो ।
इजलाशले तत्कालिन प्रधानमन्त्री डा बाबुराम भट्टराइ नेतृत्वको सरकारले सापकोटालगायत विरुद्ध मुद्दानचलाउने गरी गरेको निर्णय तथा किटानी उजुरी तामेलीमा राख्ने प्रहरीको निर्णय पनि खारेज गरिदिएको छ । २०६२ सालमा काभ्रेका अर्जुन लामालाई माओवादीले हत्या गरेको घटनामा अग्नि सापकोटालगायतको संलग्नता रहेको किटानी उजुरी लामाकी पत्नी पूर्णिमाया लामाले दिएकी थिइन् । हत्यामा अग्नि सापकोटा, सूर्यमान दोङ, यादव पौडेल, भोला अर्याल, कर्णाखर गौतम र नोर्बु लामा संलग्न रहेको किटानी उजुरी परेको थियो ।
प्रहरीले उक्त उजुरीलाई अघि बढाउनुको सट्टा तामेलीमा राखेको थियो भने बाबुराम भट्टराइको सरकारले मुद्धा नचलाउने निर्णय गरेको थियो । उजुरी तामेलीमा राख्ने प्रहरीको निर्णय विरुद्ध सर्वोच्च अदालतमा रिट दायर भएको थियो । सर्वोच्च अदालतले रिट दायर भएको १४ वर्षपछि फैसला गरेको हो । सर्वोच्चको आदेशसंगै काभ्रे प्रहरीले अब अग्नि सापकोटाविरुद्ध ज्यान मुद्दामा अनुसन्धान अघि बढाउनु पर्नेछ ।
