झापा । प्रतिनिधिसभाका सभामुख देवराज घिमिरेले बिर्तामोड–भद्रपुर सडकखण्ड निर्माणलाई तत्काल अघि बढाउन निर्देशन दिएका छन् ।
सोमवार गृहजिल्ला झापा आएका सभामुख घिमिरेले सो सडक निर्माणमा ढिलाई
भइरहेको भन्दै आफ्नो ध्यानाकर्षण भएको बताए । भद्रपुर विमानस्थलमा
उत्रिएपछि स्तरोन्नति भइरहेको तर हाल काम रोकिएको बिर्तामोड–भद्रपुर
सडकखण्डको अवस्था अवलोकन गर्दै बिर्तामोडस्थित सम्पर्क कार्यालय आएर उनी
पत्रकारसँगको भेटघाटमा बसेका थिए । सभामुख घिमिरेले बिर्तामोड–भद्रपुर सडक
खण्ड निर्माणको अवस्था बुझेपछि तत्काल निर्माण कार्य अघि बढाउन निर्देशन
दिएको बताए ।
सभामुख घिमिरेले निर्माण व्यवसायीले बजेट नपाएको भन्दै झुटो कुरा गरेर
काम रोक्ने प्रयास गरेको दावी गरे । बजेट हुँदाहुँदै पनि काम रोक्नु बेठिक
हुने सभामुख घिमिरेको भनाई छ ।
यस्तै, अघिल्लो महिना शनिश्चरे– खुदुनावारी सडकखण्डको विरिङ पुल
चर्किएको घटनामा ध्यानाकर्षण भएको उनको भनाई थियो । उनले जिल्लाका विभिन्न
विकासका परियोजनाबारे चासो राख्दै निर्माण गर्नुपर्ने र सुचारु आयोजनाहरुको
कामलाई अघि बढाइने पत्रकारहरुलाई जानकारी गराए ।
झापा क्षेत्र नं. २ बाट निर्वाचित भए पनि देशभरका नागरिकको आवाज सम्बोधन
गर्ने जिम्मेवारीमा रहेको अवगत गराउँदै उनले आफ्नो क्षेत्रको विकासलाई
प्राथमिकता दिदैं जाने बताए ।
संसदमा जिम्मेवारपूर्वक ढंगबाट काम गर्दै दलहरुबीच एकता कायम गरेर
जानुपर्ने दायित्व आफैसँग भएको उनको भनाई थियो । सभामुख घिमिरेले सरकारले
विधेयकहरु ल्याउँदा सरोकार पक्षहरुको पनि राय, सुझावका आधारमा ल्याउनुपर्ने
धारणा व्यक्त गरे । सभामुख बनेको करिव ९ महिनाको अवधिमा आफूले गरेको अनुभव
सुनाउँदै घिमिरेले ‘सरकारले विधेयकको मस्यौदा तयार पार्दा विज्ञ तथा
सम्बन्धित क्षेत्रका सरोकारवालाहरूसँग छलफलै नगरी ल्याउने गरेको’ बताए
।पछिल्लो समय अत्यधिक चर्चामा रहेको र सडक आन्दोलन नै भएको शिक्षा विधेयक
ल्याउँदा पनि यही नियति दोहोरिएको आफूले जानकारी पाएको उनको भनाई छ ।
‘अहिले नयाँ शिक्षा विधेयकले समस्या ल्याउनुको मुख्य कारण बिनाछलफल विधेयक
तयार पारिएको कारण नै हो’ सभामुख घिमिरेले भने।
उनले अगाडि भने, ‘मैले आज मात्र शिक्षा क्षेत्रका विभिन्न सरोकारवाला
संघ–संस्थाका प्रतिनिधिहरूसँग छलफल गरेँ, उहाँहरुले बुझाएको ज्ञापनपत्र
हेरेको छु। उहाँहरूको कुरा सुन्दा शिक्षा विधेयक छलफलबिना तयार पारिएको
भन्ने थाहा हुन्छ।’
संसदले ऐन कानून बनाउँदा सरोकारवालाहरुसँग परामर्श हुनुपर्ने आवश्यकता दर्शाउँदै सभामुख घिमिरेले अब संसदमा टेबुल भएका सबै विधेयकमा गहिरो छलफल गराउने प्रतिबद्धता पनि व्यक्त गरे। छलफलबिना प्रस्तुत गरिएका विधेयकले समस्या समाधान गर्ने भन्दा बढाउने भएकाले संसदमा त्यसबारे गम्भीर छलफल गराउने उनको भनाई छ ।
