झापा । नक्कली बिल विजक प्रयोग गरी ६ करोड रुपैयाँ कर छलि गरेका झापाका सातवटा व्यवसायी फर्मलाइ आन्तरिक राजस्व कार्यालय झापाले पत्र काटेको छ ।
आन्तरिक राजस्व कार्यालय भद्रपुरमा दर्ता भइ वस्तु किनबेच नगरी बिल मात्रको खरिद बिक्री गरेको आसङ्कामा कार्यालयले गरेको अनुसन्धानमा ती कम्पनी तथा फर्म फेला पारेको हो ।
कार्यालयमा दर्ता भइ नियमित रुपमा अन्य कर दाताहरु करको दायरामा आएपनि ती फर्महरुले आयकर, मूल्य अभिवृद्धि कर ,अन्त शुल्क कुनै पनि विवरण पेश नगरेको देखिएपछि कार्यालयले गरेको अनुसन्धानमा पहिलो चरणमा सातवटा फर्मले नक्कली बिल प्रयोग गरेको पाइएको आन्तरिक राजस्व कार्यालय भद्रपुरका प्रमुख कर अधिृकत कृष्णचन्द्र काफ्लेले बताए ।
ती फर्महरुलाइ ४० लाख देखि २ करोड रुपैयाँसम्म कर निर्धारण गरेको उनले जनाए । धेरै ट्रेर्डिङ् र केही उद्योग रहेको उनको भनाइ छ । आयकर ऐनका कारण फर्मकाे नाम भने सार्वजनिक गर्न नमिल्ने उनले बताए । कार्यालयले कर निर्धारण गरी पन्ध्र दिनको म्याद दिइसकेको उनले बताए । म्याद भित्र प्रमाण पेश नगरेमा स्वतः फर्महरुले कर तिर्नु पर्ने उनको भनाइ छ । उनीहरूले नक्कली नै बिल प्रयाेग गरेकाे पुष्टि भइसकेकाेले कर तिर्नै पर्ने उनले बताए ।
झापामा यस्तो कारोबार गर्नेको सङ्ख्या ठुलो भएकोले कार्यालयले तीब्ररुपमा फर्महरु फेला पारेर अनुसन्धान गरिरहेको उनको भनाइ छ । यस किसिमको कारोबारमा स्वयम व्यवसायी, कर मरामर्शदाता र लेखा व्यवसायी समेतको संलग्नता प्रारम्भिक अनुसन्धानबाट देखिएकोले थप अनुसन्धान जारी राखिएको उनले बताए ।
नक्कली बिलको कारोबार गर्ने व्यवसायी र तिनका लेखा व्यवसायी हरुमाथि कडा रुपमा छानविन गरी यो अभियानलाइ निरन्तरता दिएर राज्यलाइ कर छलि गर्नेमाथि कर निर्धारण गरी करको दायरामा ल्याइने कार्यालयले जनाएको छ ।
