झापा । चालु आर्थिक बर्षको ११ महिनामा झापाबाट २५ हजार ७ सय ९१ जना पुरुष र ६ हजार ४४ जना महिला गरी ३१ हजार ८ सय ३५ जना विदेशिएका छन् ।आर्थिक बर्ष २०७९।०८० मा जिल्लाबाट श्रम स्वीकृती लिएर २७ हजार ६ सय १९
पुरुष र ५ हजार ९ सय ५१ जना महिला गरी ३३ हजार ५ सय ७० वैदेशिक रोजगारीमा गएको सुरक्षीत आप्रवासन(सामी) परियाेजना झापाले जनाएकाे हाे ।
यही तथ्याङ्लाइ मध्यनजर गरी सामीले सञ्जाल गठन तथा क्षमता विकास कार्यक्रम अघि सारेको छ । वैदेशिक रोजगारीमा जाने र स्वदेश फर्किएपछि झन वेरोजगारी हुने क्रम बढेपछि वैदेशिक रोजगारीबाट स्वदेश फर्केका व्यत्तिहरुको सञ्जाल गठन तथा क्षमता विकास कार्यक्रम सुरु गरेकाे जनाएकाे छ ।
केही दिन अघि भद्रपुरमा सञ्जाल गठन गरेको सामीले सोमबार दमक नगर सञ्जाल गठन गरेको छ । दमक नगरभित्र रहेका १० वटा वडाबाट दुइजनाका दरले प्रतिनिधित्व हुनेगरी र पछि समितिको वैठकले एकजना सदस्य मनोनित गर्नेगरी ११ जनाको नगर सञ्जाल गठन गरिएको छ ।
गठित समितिको अध्यक्षमा विनोद ढकाल,उपाध्यक्षमा मनोहरी घिमिरे,सचिव राजकुमार वानियाँ ,सहसचिवमा रुद्र कुमार उप्रेती र सरस्वती शर्मा कोषाध्यक्षमा चयन भएका छन् ।
त्यसैगरी सदस्यहरुमा प्रेम ढकाल,भक्तबहादुर कटवाल,नन्दलाल पाण्डे, सनकुमार लिम्बु र सुर्यबहादुर राई रहेका छन् ।
गठित समितिले नगर भित्र वैदेशिक रोजगारीका विषयमा विभिन्न प्रकारका सुचना तथा परामर्श गरी जनचेतना फैलाउने सामी परियोजना झापाका कार्यक्रम अधिकृत शेखर बुढाथोकीले बताए । समिति नभएका कारण देखिएका समस्या सम्बन्धीत निकायमा पुर्याउन नसक्दा समाधान नहुने विषयलाइ ध्यानमा राखी अब समिति मार्फत वैदेशिक रोजगारका बारेमा जानकारी पाउन सजिलो भएको उनले जनाए ।
सामीको सहयोगी संस्था हेल्भेटासका कार्यक्रम अधिकृत रोहित विश्वकर्माले वैदेशिक रोजगारको वर्तमान अवस्था,सवाल,समाधानका उपायहरु,सरोकारवाला निकाय जिम्मेवारी र नवीनतम जानकारीका विषयमा कार्यपत्र प्रस्तुत गरेका थिए ।
जिल्लाका नगरपालिकामध्ये भद्रपुर, दमक,मेचीनगर र गौरीगञ्ज गाउँपालिकामा सामी परियोजना सञ्चालन भइरहेको अधिकृत वुढाथोकीले जनाए । सञ्जाल गठनमा भद्रपुर र दमक सम्पन्न भइसकेको छ भने बाँकी दुइवटा पालिकामा क्रमशः गठन गर्ने उनले बताए ।
सामाजिक विकास समिति संयोजक शारदा भट्टराईको अध्यक्षता तथा नगर प्रमुख रामकुमार थापाको प्रमुख आतिथ्यमा भएको कार्यक्रममा सामाजिक विकास शाखा अधिकृत केशव प्रसाईले सहजीकरण गरेका थिए ।
