झापा / झापाकाे भद्रपुर नगरपालिका–२ स्थित सगरमाथा चोकमा भद्रपुर–बनियानी पक्की सडकखण्डमा भएको सवारी दुर्घटनामा एक पैदल यात्रीको मृत्यु भएको छ।
बनियानीबाट पृथ्वीनगरतर्फ आउँदै गरेको मे ७ प २०३४ नम्बरको मोटरसाइकलले पैदल यात्री भद्रपुर–२ निवासी ६४ वर्षीय कुल प्रसाद खरेललाई ठक्कर दिएको थियो। दुर्घटनामा गम्भीर घाइते भएका खरेललाई उपचारका लागि ओमसाई पाथिभरा अस्पताल भद्रपुर लगिएकोमा चिकित्सकले मृत घोषणा गरेकाे प्रहरीले जानकारी दिएकाे छ।
मृतकको शव पोस्टमार्टमका लागि प्रादेशिक मेची अस्पताल भद्रपुर पठाइएको प्रहरीले जनाएको छ।
दुर्घटनामा मोटरसाइकल चालक भद्रपुर–६ निवासी २१ वर्षीय अनुराग घोषको अनुहारमा गम्भीर चोट लागेको छ। प्रादेशिक अस्पताल भद्रपुरमा सामान्य उपचारपछि थप उपचारका लागि ओमसाई पाथिभरा अस्पताल भद्रपुर रेफर गरिएको छ। उपचारमा उनकी श्रीमती संलग्न रहेको जनाइएको छ।
त्यसैगरी मोटरसाइकलको पछाडि सवार २१ वर्षीय मन्दिप दंगालको अवस्था सामान्य रहेको छ।
दुर्घटनामा संलग्न मोटरसाइकल प्रहरीले नियन्त्रणमा लिएको छ भने घटनाको सम्बन्धमा थप अनुसन्धान भइरहेको जनाएको छ।
