झापा । ७३ औं अन्तराष्टिय भन्सार दिवसको अवसरमा भद्रपुर भन्सार कार्यालयले उत्कृष्ट कर्मचारी, भन्सार एजेन्ट र फर्मलाई सम्मान गरेको छ । आइतबार ७३ औं अन्तराष्टिय भन्सार दिवसको अवसरमा उत्कृष्ट कर्मचारीतर्फ नायब सुब्बा हरिप्रसाद गुरागाईँ, कम्प्युटर अपरेटर रूपकराज अर्याल, लेखापाल सञ्जय दाहाल र कार्यालय सहयोगी ज्ञानबहादुर कार्कीलाई सम्मान गरेकाे हाे ।
त्यस्तै भन्सारको राजश्व सङ्कलनमा महत्त्वपूर्ण योगदान पुर्याए बापत उत्कृष्ट भन्सार एजेन्टतर्फ अनुराग गड्तौला, उत्कृष्ट फर्महरू महावीर ट्रेडिङ, शिव स्टोर्स, नवयुवक सुर्ती उद्योग र के.आर.एस भेन्चर्सलाई सम्मान गरिएको थियो । उनीहरूलाई भद्रपुर नगरपालिकाका नगर प्रमुख गणेश पोखरेल, भन्सार प्रमुख अर्जुन सिटौला लगायतले सम्मानपत्र वितरण गरेका थिए । भद्रपुर नगर प्रमुख पोखरेलको प्रमुख आतिथ्यमा भएको कार्यक्रमको सञ्चालन भन्सारका नायव सुब्बा डिल्ली आचार्यले गरेका थिए ।
भन्सार दिवसको अवसरमा भन्सार कार्यालय परिसरदेखि मेची पुलसम्म भन्सार
कर्मचारी, वडा प्रहरी कार्यालय भद्रपुर र सशस्त्र प्रहरी बल नेपाल
प्रस्तावित सुरक्षा गुल्म भद्रपुरले संयुक्त रुपमा सरसफाइ गरेका थिए ।
त्यसैगरी झापाका प्रमुख जिल्ला अधिकारी गोपालकुमार अधिकारीको प्रमुख
आतिथ्यमा भेटघाट तथा चियापान कार्यक्रम समेत सम्पन्न भएको थियो ।
