झापा। प्रेस चौतारी नेपाल झापाले २७औँ स्थापना दिवस मनाएको छ । चौतारीले झापाको शिवसताक्षी–१० स्थित धार्मिक तथा पर्यटकीय क्षेत्र दोमुखामा स्थापना दिवस मनाएको हो ।
कार्यक्रममा माघ ११ गते सम्पन्न जिल्ला अधिवेशनबाट चयन भएको प्रेस चौतारी झापाको नयाँ समितिका पदाधिकारी तथा सदस्यहरुलाई प्रमाणपत्र वितरण गरिएको थियो । सोहि कार्यक्रममा पत्रकार उपचार कोषकी संयोजक भिमाकुमारी शिवाकोटीलाई समेत प्रमाण पत्र प्रदान गरिएको थियो ।
कार्यक्रमका बिच बिर्तामोड नगरपालिकाकी नगर प्रमुख पवित्रा महतारा प्रसाईले आफ्नो स्वर्गीय श्रीमान ज्ञानुराम प्रसाईको स्मृतिमा ५१ हजार रुपैयाँ पत्रकार उपचार कोषलाई सहयोग गर्ने घोषणा गरिन् । त्यस्तै पत्रकार उपचार कोषकी संयोजक भिमा शिवाकोटीले २५ हजार, नेकपा एमाले बिर्तामोड नगर अध्यक्ष सुवास भट्टराईले ११ हजार रुपैँया सहयोग उपलब्ध गराए ।
सोहि कार्यक्रममा ‘अश्लिल, मिथ्या तथा भ्रामक बिषयवस्तु प्रचारप्रसार बिरुद्ध झापाली पत्रकार प्रतिवद्ध छौं’ भन्दै हस्ताक्षर संकलन गरिएको थियो ।
नेपाली कांग्रेस झापाका सचिव कृष्ण हुमागाई, नेपाल पत्रकार महासंघ कोशी प्रदेशकी उपाध्यक्ष अम्बिका भण्डारी, प्रेस सेन्टर नेपाल झापाका अध्यक्ष पुष्प खड्कालगायतले शुभकामना मन्तव्य राखेका थिए ।
प्रेस चौतारी नेपाल झापाका अध्यक्ष प्रदिप परियारको अध्यक्षतामा भएको कार्यक्रम सचिव युवराज आचार्यले सञ्चालन गरेका थिए ।
