झापा । आजदेखि देशभर लगातार चार दिन सार्वजनिक बिदा परेको छ । पर्व, दिवस तथा साप्ताहिक बिदा एकैसाथ परेपछि सरकारी तथा सार्वजनिक सेवाहरू सोमबार मात्रै सञ्चालनमा आउने भएका छन् ।
सरकारले इस्लाम धर्मावलम्बीहरूको महान् पर्व बकर इदको अवसरमा आज जेठ १४ गते बिहीबार देशभर सार्वजनिक बिदा दिएको हो । गृह मन्त्रालयले एक विज्ञप्ति जारी गर्दै मुस्लिम आयोगको सिफारिसका आधारमा बिदा दिने निर्णय गरिएको जनाएको छ ।
आज बिहीबार बकर इदको सार्वजनिक बिदा परेको छ भने शुक्रबार जेठ १५ गते गणतन्त्र दिवसको अवसरमा नियमित सार्वजनिक बिदा हुनेछ ।
त्यसपछि शनिबार र आइतबार साप्ताहिक बिदा परेकाले लगातार चार दिन सरकारी कार्यालय, बैंक तथा वित्तीय संस्था लगायतका सार्वजनिक सेवा बन्द रहनेछन् ।
अब सरकारी तथा सार्वजनिक सेवाहरू आगामी सोमबार जेठ १८ गतेदेखि मात्रै पुनः सञ्चालनमा आउनेछन् ।
