झापा । मिनी माउन्टेन इङलिस सेकेण्डरी बोर्डिङ स्कुल बाह्रदशीका विद्यार्थीहरु धाराको पानीमा खराबी नभएर मास हिस्टेरियाका कारण बिरामी परेको हुनसक्ने चिकित्सकले बताएका छन् ।
बाह्रदशी गाउँपालिका वडा न.६ स्थित मिनी माउन्टेन
ईङलिस सेकेण्डरी बोर्डिङ स्कुलमा अध्ययनरत विद्यार्थीहरुले सोही बिद्यालयको
खानेपानीको धाराबाट पानी पिउँदा पेट दुखेर १७ जना सिकिस्त भएका थिए ।
बिरामी हुने विद्यार्थीहरु कक्षा ४ र ५ का हुन् । उनीहरु सबै निको भई
डिस्चार्ज भएको जिल्ला प्रहरी कार्यालयका सूचना अधिकारी डीएसपी खगेन्द्र बहादुर खड्काले बताए । उनले धाराको पानी खाँदा बिरामी हुनुपर्ने कारणबारे
अनुसन्धान भइरहेको बताए । विद्यालयको त्यस धाराको पानी विज्ञद्वारा परीक्षण
गरिने उनले जानकारी दिए ।
विद्यालयका संचालक खगेन्द्र सुवेदीले पहिला ३–४ जनाले धाराको पानी खाएर भुँडी दुख्यो भनेर लडीबडी गरेको बताए । त्यसपछि उनीहरुका अरु साथीहरुले पनि त्यसरी नै भुँडी दुख्यो भनेर रुन कराउन थालेका थिए । बिरामी भएका सबै विद्यार्थीहरुलाई अस्पताल लगेर निको पारेर ल्याइएको उनले जानकारी दिए । धाराको पानीमा खराबी नभएर बिरामी विद्यार्थीहरुमा मास हिस्टेरियाको लक्षण देखिएको संचालक सुवेदीले बताए ।
बिर्तासिटी हस्पिटलका चिकित्सक डा. रमेश यादवले विद्यार्थीहरुमा मास हिस्टेरियाको लक्षण देखिएको जानकारी दिए। उनले धाराको पानी पनि परीक्षण गर्न आवश्यक रहेको बताए । धाराको पानीमा समस्या नदेखिएको खण्डमा मनोवैज्ञानिक रुपमा विद्यार्थीहरु सामूहिक बिरामी भएकाे हुन सक्ने उनले बताए ।
