साङ्केतिक तस्वीर
झापा । झापाको तीन ठाउँमा आगलागी हुँदा लाखौँको क्षति भएको छ । दमक, अर्जुनधारा र झापा गाउँपालिकामा आगलागी भएको हो ।
गएराति १२.१५ बजे दमक नगरपालिका वडा नम्बर १ रवि स्ट्यान्ड बस्ने शिव राईको अढाई तले घरको भुइँतलामा किराना ,कस्मेटिक र खाद्यान्न पसल सञ्चालन गरेका ४३ वर्षीय रामकिशोर साहको पसलमा आगलागी भएको हो ।
विद्युत् सर्ट भई आगलागी हुँदा पसलमा रहेका सम्पूर्ण किराना सामान, कस्मेटिक सामान, खाद्यान्न सामान, झ्याल, ढोका, फ्रिज र अन्य सरसामानसमेत जलेर नष्ट हुँदा अन्दाजी १५ लाख बराबरको क्षति भएको छ । उक्त आगो नेपाल प्रहरी, दमक नगरपालिकाको दमकल र स्थानीयको सहयोगमा राति १ बजे पूर्णरुपमा नियन्त्रणमा आएको प्रहरीले जनाएको छ ।
त्यस्तै हिजो साँझ ६ः४५ बजे झापा गाउँपालिका वडा नं. ७ रमितेटोल बस्ने लुखी हस्दाको घरमा आगलागी भएको छ । बिद्युत् लाइन सर्ट भई आगलागी हुँदा हस्दाको टिनको छानो र बाँसको टाटी बेराले बनेको ३ कोठे घरमा रहेका सम्पूर्ण सामान र नजिकै रहेको ग्वालीसमेत पूर्णरुपमा जल्दा अन्दाजी २ लाख ५० हजार बराबरको क्षति भएको जनाइएको छ ।
त्यस्तै गएराति १० बजे अर्जुनधारा नगरपालिका वडा नं.११ सालबारी बस्ने ४७ वर्षीय भूमिनाथ बराल र सोही ठाउँ.बस्ने अमर राउतको एक बिगाहा धानको कुन्यूमा अचानक आगलागी भएको छ । आगलागीबाट अन्दाजी २ लाख १० हजार बराबरको क्षति भएको जिल्ला प्रहरी कार्यालयले जनाएको छ ।
उक्त आगो प्रहरी,स्थानीयवासी , बिर्तामोड,मेचीनगर र भद्रपुर नगरपालिकाको दमकलको सहयोगमा राति १२ बजे पूर्णरुपमा नियन्त्रणमा आएको डीएसपी कृष्णकुमार चन्दले जानकारी दिए । सुख्खायाम शुरु भएपछि केही दिनदेखि झापामा आगलागीका घटना बढेको छ ।
