झापा । आदिवासी राजवंशी भाषिक सांस्कृतिक विकास प्रतिष्ठानले सात जना जग्गादातालाई शुक्रबार सम्मान गरेको छ ।
प्रतिष्ठानको प्रथम स्थापना दिवस तथा साधारण सभाको अवसरमा प्रतिष्ठानको संग्राहलय निर्माणका लागि निःशुल्क जग्गा दिने जग्गादातासहित विभिन्न व्यक्तिहरूलाई सम्मान गरेको हो ।
भद्रपुर– ६ स्थित भातियाबारीमा प्रतिष्ठानको भवन निर्माण स्थलमा आयोजित कार्यक्रममा जग्गादाताहरू धरेन्द्र राजवंशी, कमल राजवंशी, मालचन राजवंशी, धनमति तामाङ राजवंशी, अर्जुनबहादुर विष्ट, गणेश अधिकारी र श्यामसुन्दर अग्रवाललाई सम्मान पत्रले सम्मान गरिएको हो । उनीहरूले प्रतिष्ठानलाई एक÷एक कट्ठा गरी जम्मा सात कट्ठा जमिन दिएका छन् ।
कार्यक्रमका प्रमुख अतिथि भद्रपुर नगरपालिकाका प्रमुख गणेश पोखरेलले उद्घाटन गरेको कार्यक्रममा प्रतिष्ठानका अध्यक्ष तुलराम सिंह राजवंशीले प्रतिष्ठानले गरेको वार्षिक गतिविधिको बारेमा जानकारी गराएका थिए ।
नगरपालिकाले छुट्टाएको बजेटबाट गत वर्ष प्रतिष्ठानको कम्पाउन्ड वाल बनाइएको र संस्था दर्ता गराइएको बारेमा उनले जानकारी गराए ।
कार्यक्रममा प्रमुख अतिथि नगर प्रमुख पोखरेल, ४ नम्बर वडा अध्यक्ष हंशधर राजवंशी, ६ नम्बर वडा अध्यक्ष रतिया राजवंशी, ८ नम्बर वडा अध्यक्ष गौरव सुब्बा (मनोज) नेकपा एमालेका जिल्ला सहसचिव असारु राजवंशी, नेकपा माओवादी केन्द्रका डिल्ली घिमिरे (हिक्मत), प्रतिष्ठानका सल्लाहकार संयोजक सुमनसिंह राजवंशी लगायतले मन्तव्य राखेका थिए ।
स्वागत मन्तव्य प्रतिष्ठानका उपाध्यक्ष सुधीर राजवंशीले राखेको कार्यक्रमको सञ्चालन सचिव नन्दलाल राजवंशीले गरेका थिए । प्रतिष्ठानको प्रथम अधिवेशन समेत भएकोले बन्द सत्रबाट नयाँ कार्य समिति चयन गरिने जनाइएको छ ।
