झापा / झापाकाे झापा गाउँपालिकामा माेटर चाेरेर भारत तर्फ लैजादै गर्दा एक जना पक्राउ परेका छन् ।
पक्राउ पर्नेमा कनकाई ४ सुरुङ्गा बस्ने अन्दाजी वर्ष २७ का अशोक मगर पक्राउ परेका हुन् । उनलाई शंका लागेर चेकजाँच गर्दा उनले मोटर चोरी गरेको पुष्टि भएको थियो । मोटरसहित नियन्त्रणमा लिई उनलाई आवश्यक कारवाहीको लागि पठाइएको छ ।
आज बिहान ६.५० बजे झापा गाउँपालिका वडा नं. ४ चौधरी बस्ती इलाकामा सशस्त्र प्रहरी बल नेपाल बिओपी टाँघनडुब्बाबाट खटिएको सशस्त्र प्रहरी हवल्दार गणेशबहादुर गुरुङ्गको कमाण्डमा ५ जना र इलाका प्रहरी कार्यालय कुमरखोदबाट प्रहरी सहायक निरीक्षक दिनेशकुमार माझीको कमाण्डमा ५ जनाको संयुक्त टोलीले मगरलाई पक्राउ गरेकाे थियाे ।
झापा गाउँपालिकामा चोरीका घटना बढ्दै गएको छ । चार दिनअघि झापा गाउँपालिका वडा नं ३ मा चोरी भएको थियो ।
झापा गाउँपालिका वडा नं ३ कामाटोली वजारदेखि लगभग २०० मिटर टाढा विनिताकुमारी गणेशको घरबाट घरमा कोही नभएको बेला चोरले लगभग २२ तोला चाँदी , एक तोला सुन र नगद दुई हजार पाँचसय चोरी गरेका थिए ।
