झापा । झापाको दमकमा एक व्यक्तिमाथि छुरा प्रहार गरेर भाग्दै गर्दा दुर्घटनामा परी घाईते भएका छन् ।
दुर्घटनामा धरान ३ बस्ने २९ वर्षीय एजात अहमद घाईते भएकाे जिल्ला प्रहरी कार्यालय झापाले जनाएकाे छ ।
घटना विवरण अनुसार साेमबार दिउँसो १२ः५० बजे दमक ६ नमुना मार्ग बस्ने अस्तव आलमले संचालन गरेको नमुना सटिङ सुटिङ टेलर्समा काम गर्ने दमक नगरपलिका .७ बस्ने २७ वर्षीय सोनु अहमदलाई धरान ३ बस्ने २९ वर्षीय एजात अहमदले छुरा हानेका थिए । लेनदेनको बिषयलाई लिएर विवाद हुँदा अहमदले धारिलो हतियार सोनुको पेटको बाँयापट्टी प्रहार गरी घाईते बनाएका थिए । घाइतेलाई लाईफ लाईन अस्पताल दमकमा सामान्य उपचारपश्चात थप उपचारको लागि बीएण्डसी अस्पताल बिर्तामोड ल्याइएकोमा त्यहाँ उपचार संभव नभएपछि धरान लगिएको प्रहरीले जनाएकाे छ ।
छुरा प्रहार गर्ने एजात अहमद तत्काल प्रदेश न.१–०२–०४५ प ६३१९ नम्बरको स्कुटीमा चढेर भाग्दै गर्दा दमक नगरपालिका ६ गणतन्त्र चोकमा आफै अनियन्त्रित भई दुर्घटना भएकाे जिल्लाका डिएसपी कृष्णकुमार चन्दले जानकारी दिए ।
बाँया खुट्टामा चोट लागेका एजातको निम्स अस्पताल दमकमा प्रहरीको निगरानीमा उपचार भइरहेको उनले जनाए ।
