झापा । चार थान भरुवा बन्दुकसहित ताप्लेजुङमा एकजनालाई प्रहरीले पक्राउ गरेको छ ।
चाडपर्वलाई पनि लक्षित गरी खटिएको संयुक्त प्रहरी टोलीले आज बिहान ताप्लेजुङ फक्तालुङ– ५ बैताङगु एरियातर्फ गस्ती गर्ने क्रममा गोप्य सूचनाको आधारमा स्थानीय जितबहादुर लिम्बूको घर कोठामा खानतलासी गरेको थियो । त्यसक्रममा एक थान एक नाले भरुवा बन्दुक फेला परेको हो ।
त्यस्तै सोही ठाउँमा रहेको देबीस्थान जंगलको ओडारमा बेवारिसे अवस्थामा
राखिएको ३ थान भरुवा बन्दुकसमेत बरामद भएको छ । ४ थान भरुवा बन्दुक र
लिम्बूलाई थप अनुसन्धानको लागि जिल्ला प्रहरी कार्यालय ताप्लेजुङतर्फ
ल्याउँदै गरेको जनाइएको छ ।
सशस्त्र प्रहरी बल, नेपाल नं.१ गुल्म हे.क्वा. कञ्चनजंघा र जिल्ला प्रहरी कार्यालय ताप्लेजुङबाट चाडपर्वलाई पनि लक्षित गरी संयुक्त गस्ती टोली खटिएको थियो ।
