झापा / झापाको भद्रपुरमा आगामी बैशाखको पहिलो साता चन्द्रगढी महिला गोल्डकप आयोजना हुने भएको छ।
नेपाली महिला फुटबल इतिहासमै सर्वाधिक पुरस्कार राशिसहित हुन लागेको यस प्रतियोगिताको मुख्य प्रायोजक भद्रपुरकै ओम साई पाथिभरा हस्पिटल रहेको छ, जसले स्थानीय स्तरबाट खेलकुद प्रवर्द्धनमा उल्लेखनीय योगदान पुर्याएको छ।
आयोजक चन्द्रगढी युवा क्लबका अध्यक्ष रोहित सुब्बाका अनुसार प्रतियोगिता बैशाख ५ गतेदेखि १४ गतेसम्म भद्रपुरस्थित मेची रंगशालामा सञ्चालन हुनेछ। प्रतियोगिताको विजेताले ११ लाख रुपैयाँ नगद पुरस्कार प्राप्त गर्नेछ, जुन महिला फुटबलको इतिहासमै अहिलेसम्मकै सबैभन्दा ठूलो राशि हो। यसबाहेक प्रत्येक खेलको प्लेयर अफ द म्याचले ११ हजार रुपैयाँसहित ट्रफी पाउनेछन् भने प्रतियोगिताको सर्वोत्कृष्ट खेलाडीलाई ५० हजार रुपैयाँ प्रदान गरिनेछ। विधागत उत्कृष्ट खेलाडीहरूलाई जनही २५ हजार रुपैयाँ पुरस्कार दिइनेछ।
प्रतियोगितामा १० टोलीको सहभागिता रहनेछ, जसमा नेपालका विभागीय टोलीहरू एपीएफ, नेपाल पुलिस र त्रिभुवन आर्मी फुटबल क्लबका साथै ए डिभिजन क्लबहरू चर्च ब्वाइज युनाइटेड, संकटा फुटबल क्लब र आयोजकको एक टोली रहनेछन्। यसका अतिरिक्त भारत र भुटानका एक–एक क्लबको सहभागिता सुनिश्चित भइसकेको छ भने बंगलादेश र जापानका क्लबहरूसँग पनि सहभागिताका लागि छलफल भइरहेको आयोजकले जनाएको छ।
नेपाली टोलीहरूका लागि विशेष नियमसमेत लागू गरिएको छ, जसअनुसार एक टोलीले बढीमा चारजना विदेशी खेलाडी दर्ता गर्न पाउनेछ भने खेलको क्रममा एकैपटक तीनजना विदेशी खेलाडी मात्र मैदानमा उतार्न पाइनेछ। प्रतियोगितालाई झापालाई महिला फुटबलको हबका रूपमा विकास गर्ने, स्थानीय प्रतिभालाई राष्ट्रिय स्तरसम्म पुर्याउने र महिला खेलाडीहरूलाई अन्तर्राष्ट्रिय स्तरको प्रतिस्पर्धामा उभ्याउने दीर्घकालीन लक्ष्यसहित आयोजना गर्न लागिएको आयोजकको भनाइ छ।
