झापा । झापाको हल्दिवारीमा एक घर जलेर नष्ट हुँदा १२ लाख मूल्य बराबरकाे क्षति भएको छ ।
गए राति अन्दाजी १ः३० बजेको समयमा हल्दिबारी–३ रमाईलो चोक निवासी ताराबल्लब गिरीको काठको घरमा भएको आगलागीबाट घर पूर्र्ण रुपले जलेर नष्ट भएको जिल्ला प्रहरी कार्यालय झापाले जनाएकाे छ । जिल्लाका डिएसपी कृष्ण कुमार चन्दका अनुसार घरमा भएको अन्नपात, लताकपडा, फर्निचरलगायत नष्ट भएको छ भने ९ वटा खसी बाख्रा जलेर मरेका छन् । त्यस्तै एउटा बाच्छो घाइते भएको छ ।
भद्रपुर र मेचीनगरबाट आएका दमकल, स्थानीयवासी र प्रहरीको सहयोगमा बिहान ४ बजे आगो नियन्त्रणमा आएको थियो ।आगलागीबाट करिब १२ लाख बराबरको क्षति भएको बताइएको छ । आगलागीको कारण थाहा हुन नसकेको प्रहरीले जनाएको छ ।
