झापा । लागूऔषध मुद्दामा चार वर्ष जेल सजाय भुक्तान गरी एक वर्ष अगाडि छुटेका व्यक्तिबिच भद्रपुर स्थित चैतुमन्दिरमा हतियारसहित भिडन्त हुनेक्रममा दुईजना पक्राउ परेका छन् । पक्राउ पर्नेमा १० चैतुमन्दिर बस्ने विनोद राजवंशी र भद्रपुर १० कै चन्द्रगढी बजारका चन्द्रगढी यूथ क्लब (सीवाइसी) का रेजिन सुब्बा रहेका छन् ।
घटना विवरण अनुसार शनिबार दिउँसो १२ः३० बजे राजवंशीलाई घरमा बसिरहेको अवस्थामा चन्द्रगढी यूथ क्लब (सीवाइसी) का करिब २५ जना युवाहरू आई कुटपिट गर्दा राजवंशीले घरमा भएको कट्टा निकाली ती युवाहरूलाई लखेटेका थिए ।
केही समयपश्चात् पुनः ती युवाहरू खुडा लिएर राजवंशीलाई गालीगलौज गरिरहेको अवस्थामा जिल्ला प्रहरी कार्यालयबाट इन्स्पेक्टर विजय चौहानको कमान्डमा प्रहरी टोलीले उनीहरूलाई नियन्त्रणमा लिएको थियाे ।
घटनापछि दुवै समूहका अभिभावक राखेर सहमती गरी परिवारकाे जिम्मा लगाइएकाे जिल्लाका डिएसपी खगेन्द्रबहादुर खड्काले जानकारी दिए । राजवंशीलाइ लागूऔषधका बारेमा सम्झाउन गएका युवाहरूलाइ हतियार देखाएपछि युवाहरूले पनि हतियार लिएर राजवंशीकाे घरमा पुगेपछि विवाद बढेकाे उनले जानकारी दिए ।
