झापा / कोशी प्रदेश सरकारले आगामी आर्थिक वर्ष २०८३/८४ का लागि ४० अर्ब ४४ करोड ९८ लाख रुपैयाँ बराबरको वार्षिक बजेट सार्वजनिक गरेको छ। प्रदेश सरकारका आर्थिक मामिला तथा योजना मन्त्री विदुरकुमार लिङ्थेपले प्रदेशसभाको बैठकमा उक्त बजेट प्रस्तुत गरेका हुन्।
बजेटमा चालूतर्फ १३ अर्ब ९७ करोड ६३ लाख, पुँजीगततर्फ २० अर्ब ७५ करोड ९९ लाख, वित्तीय व्यवस्थातर्फ १५ करोड र वित्तीय हस्तान्तरणतर्फ ५ अर्ब ५६ करोड ३६ लाख रुपैयाँ विनियोजन गरिएको छ। यो बजेट चालू आर्थिक वर्षको तुलनामा १२.७४ प्रतिशतले बढी हो।
बजेटमा कृषि क्षेत्रलाई मुख्य प्राथमिकतामा राखिएको छ। प्रदेश सरकारले कृषिको विकास, आधुनिकीकरण र उत्पादकत्व वृद्धिका लागि ६ अर्ब २८ करोड रुपैयाँ विनियोजन गरेको छ। त्यस्तै, शिक्षा र सामाजिक क्षेत्रमा ३ अर्ब १० करोड रुपैयाँ विनियोजन गरिएको छ।
प्रदेश सरकारले पर्यटन क्षेत्रलाई समृद्धिको आधारका रूपमा अघि सार्दै 'कोशी प्रदेश भ्रमण वर्ष २०८३–२०८५' लाई बजेटको प्राथमिक कार्यक्रममा समावेश गरेको छ।
उल्लेखनीय छ कि प्रदेश स्थापनाको वर्ष २०७४/७५ मा कोशी प्रदेशको बजेट मात्र १ अर्ब २ करोड रहेको थियो। त्यसपछिका वर्षहरूमा बजेटको आकार क्रमशः वृद्धि हुँदै यस वर्ष ४० अर्बभन्दा माथि पुगेको हो।
प्रदेश सरकारले भौतिक पूर्वाधार, स्थानीय सडक, खानेपानी, सिँचाई, ऊर्जा, शिक्षा, वन तथा वातावरण, कानून एवं शान्ति, र विपद् व्यवस्थापन लगायतका क्षेत्रमा लगानी बढाउने योजना सार्वजनिक गरेको छ।
