झापा । ठूलो परिमाणमा अफिमसहित दुई जनालाई बर्दिया प्रहरीले पक्राउ गरेको छ ।
पक्राउ पर्नेमा जाजरकोट नलगाड नगरपालिका-७ का ३७ वर्षीय भक्तबहादुर शाही र चितवन राप्ती नगरपालिका–११ आरपानीका २७ वर्षीय कुमार वाइबा रहेका छन् ।
बाँसगढी नगरपालिका–१ चेपाङस्थित रत्न राजमार्ग सडक खण्डबाट प्रहरीले उनीहरूलाई पक्राउ गरेको हो । जिल्ला प्रहरी कार्यालय बर्दियाले जनाएकाे छ ।
आइतबार बेलुका शाहीले चलाएको लु ८० प १४६७ नम्बरको मोटरसाइकलमा पछाडि वाइबा सवार भई जाजरकोटदेखि नेपालगन्जतर्फ आउँदै गर्दा चेकिङका क्रममा प्रहरीले नियन्त्रणमा लिएको थियो ।
वाइबाले भिरेको कालो झोलाभित्र २२ वटा पोका लुकाइराखेको अवस्थामा २१ किलो ५ सय ६७ ग्राम अफिम फेला परेको प्रहरीले जनाएको छ ।
दुवै जनालाई नियन्त्रणमा लिई सोमबार अदालतबाट ५ दिनको म्याद थप गरी इलाका प्रहरी कार्यालय मोतिपुरमा राखी अनुसन्धान अघि बढाइएको जिल्ला प्रहरी कार्यालयका डीएसपी चक्रबहादुर डमरपालले जानकारी दिए ।
