झापा / पर्साको वीरगञ्जमा सञ्चालित क्यासिनोबाट गाउँपालिका अध्यक्ष र प्रहरी निरीक्षकसहित आठ जना पक्राउ परेका छन्। पक्राउ पर्नेमा सखुवाप्रसौनी गाउँपालिकाका अध्यक्ष जसवन्त यादव र इलाका प्रहरी कार्यालय पोखरियाका प्रहरी निरीक्षक प्रदीप पौडेल समेत छन्।
जिल्ला प्रहरी कार्यालय पर्साका अनुसार वीरगञ्ज महानगरपालिका–१४ गण्डकस्थित गोल्डेन फिंगर गेमिङ जोन मा नेपाली नागरिक प्रवेश गरी जुवा खेलिरहेको सूचनाका आधारमा प्रहरीले छापा मारेको थियो। शनिबार राति गरिएको कारबाहीका क्रममा जुवा खेलिरहेको आरोपमा चार जना र नेपालीलाई क्यासिनो प्रवेश गराएर जुवा खेलाउन सहयोग गरेको आरोपमा चार कर्मचारी पक्राउ परेका हुन्।
पक्राउ पर्नेमा इन्स्पेक्टर पौडेल र गाउँपालिका अध्यक्ष यादवसँगै चन्दन सहनी र ओमप्रकाश बैठा छन्। त्यस्तै क्यासिनोका कर्मचारी विजयकुमार पटेल, दिनेशकुमार पटेल, जयदेव साह र प्रदेशी साह पनि नियन्त्रणमा लिइएका छन्।
प्रहरीका अनुसार नेपालमा नेपाली नागरिकलाई क्यासिनो प्रवेश गरी जुवा खेल्न प्रतिबन्ध छ। यसैबीच गाउँपालिका अध्यक्ष यादव सरकारी ना.१ झ १६८७ नम्बरको स्कर्पियो चढेर क्यासिनो पुगेको विवरणसमेत सार्वजनिक भएको छ। प्रहरीले सरकारी सवारीसाधन क्यासिनो परिसरमा प्रयोग भएको विषयलाई समेत अनुसन्धानको दायरामा राखेको जनाएको छ।
प्रहरीले घटनाबारे थप अनुसन्धान अघि बढाएको छ। पक्राउ परेकालाई अदालतबाट म्याद थप गरी आवश्यक कानुनी प्रक्रिया अघि बढाउने तयारी भइरहेको प्रहरीले जनाएको छ।
नोट: केही प्रारम्भिक समाचारमा सात जना भनिए पनि जिल्ला प्रहरीसम्बन्धी पछिल्ला विवरणमा इन्स्पेक्टर र गाउँपालिका अध्यक्षसहित ८ जना पक्राउ परेको उल्लेख छ।
