झापा, भद्रपुर । मिति २०८२ चैत १४ गते राति आएको हावाहुरी र असिनापानीका कारण भद्रपुर नगरपालिका वडा नं. ३ सतार बस्तीमा घर तथा सम्पत्तिमा क्षति पुगेको छ। प्रहरी चौकी मेचिपारीका अनुसार उक्त प्राकृतिक विपत्तिबाट स्थानीय बासिन्दाहरूको गरी जम्मा रु. १,३०,००० बराबरको क्षति भएको छ।
प्राप्त विवरण अनुसार सोही स्थानका बुधय मुर्मुको टिनको छानो र बेरा भएको एक तल्ले भुईँ घर हावाहुरीले उडाएको साथै कुखुराका २० वटा चल्ला मरेका छन् जसबाट करिब रु. ५०,००० बराबरको क्षति भएको छ। त्यसैगरी कमल गणेशको टिनको छानोबेरा भएको एक तल्ले घर पूर्ण रूपमा क्षति भई करिब रु. १५,००० बराबरको नोक्सानी भएको छ भने दुखिया महत्तोको टिनको छानोबेरा भएको एक तल्ले भान्सा घर पूर्ण रूपमा क्षति भई करिब रु. ३५,००० बराबरको क्षति भएको छ।
त्यस्तै मिस्ति राजवंशीको टिनको छानोबेरा भएको एक तल्ले भुईँ घर पनि पूर्ण रूपमा क्षति भई करिब रु. ३०,००० बराबरको नोक्सानी भएको प्रहरीले जनाएको छ। घटनापछि प्रहरी टोलीले स्थलमै पुगेर विवरण संकलन गरेको र प्रभावित परिवारलाई आवश्यक सहयोगका लागि सम्बन्धित निकायसँग समन्वय भइरहेको बताइएको छ।
