झापा / सामाजिक सञ्जालमार्फत चर्चामा आएको कक्रोच जनता पार्टी (CJP) ले शनिबार राजधानी दिल्लीको जन्तर–मन्तरमा पहिलो ठूलो सडक प्रदर्शन गर्दै भारतका केन्द्रीय शिक्षामन्त्री धर्मेन्द्र प्रधानको राजीनामा माग गरेको छ। प्रदर्शनमा हजारौं विद्यार्थी, युवा तथा रोजगारीका आकांक्षीहरू सहभागी भएका थिए।
प्रदर्शनको नेतृत्व कक्रोच जनता पार्टीका संस्थापक अभिजित दिपकेले गरेका थिए। अमेरिकाबाट भारत फर्किएलगत्तै उनी आन्दोलनमा सहभागी भएका हुन्। प्रदर्शनकारीहरूले एनइइटी लगायत विभिन्न राष्ट्रिय परीक्षामा भएको भनिएको प्रश्नपत्र चुहावट, भर्ती प्रक्रियामा देखिएको अनियमितता तथा बढ्दो बेरोजगारीको विरोध गरेका थिए।
आन्दोलनका क्रममा प्रदर्शनकारीहरूले “हाम्रा पोस्ट मेटाउन सकिन्छ, आवाज मेटाउन सकिँदैन” भन्ने नारासहित सरकारमाथि युवाका मुद्दा बेवास्ता गरेको आरोप लगाए। उनीहरूले शिक्षा प्रणालीमा सुधार, पारदर्शिता र जिम्मेवार व्यक्तिमाथि कारबाहीको माग गरेका थिए।
प्रदर्शनलाई मध्यनजर गर्दै दिल्लीमा कडा सुरक्षा व्यवस्था मिलाइएको थियो। जन्तर–मन्तर क्षेत्रसहित प्रधानमन्त्री, गृहमन्त्री र शिक्षामन्त्रीको निवास आसपास अतिरिक्त प्रहरी परिचालन गरिएको थियो।
आन्दोलनमा शिक्षा अभियन्ता साेनम वाङ्चुके पनि सहभागी भएका थिए। उनले विद्यार्थीका समस्या समाधान गर्न सरकारलाई आग्रह गर्दै शिक्षा प्रणालीमा सुधार आवश्यक रहेको बताएका थिए। केही विपक्षी नेताहरूले समेत आन्दोलनप्रति समर्थन जनाएका छन्।
कक्रोच जनता पार्टी केही साताअघि सामाजिक सञ्जालमा व्यंग्यात्मक अभियानका रूपमा सुरु भएको भए पनि अहिले लाखौं युवाको समर्थनसहित सडक आन्दोलनमा रूपान्तरण भएको बताइएको छ। विश्लेषकहरूका अनुसार यो आन्दोलन भारतमा शिक्षा, रोजगारी र युवाका मुद्दालाई लिएर बढ्दो असन्तुष्टिको संकेतका रूपमा हेरिएको छ।
प्रदर्शन शान्तिपूर्ण रूपमा सम्पन्न भएको आयोजकहरूले बताएका छन्। यद्यपि कक्रोच जनता पार्टीले आफ्ना माग पूरा नभएसम्म आन्दोलन जारी रहने चेतावनी दिएको छ।
